შსს ვახო მეგრელიშვილის და იაგო ხვიაჩიას დაკავების შესახებ განცხადებას ავრცელებს.

უწყების მიერ გავრცელებულ განცხადებაში ნათქვამია, რომ "გირჩის" წევრები ადმინისტრაციული წესით დააკავეს, კერძოდ ადმინისტრაციულ სამართალდარღვევათა კოდექსის 166-ე და 173-ე მუხლებით,  რაც წვრილმან ხულიგნობას და პოლიციის მიმართ წინააღმდეგობას გულისხმობს.

ყველაფერი მას შემდგომ დაიწყო, რაც „გირჩის" წევრებმა პარტიის ოფისის ფანჯრებიდან დაინახეს, რომ სამოქალაქო ტანსაცმელში ჩაცმული პოლიციელები 1 პირს აკავებდნენ და მისი ნარკოლოგიურ შემოწმებაზე გადაყვანა სურდათ. მოგვიანებით, შსს-ს განცხადება გაავრცელა და აღნიშნა, რომ პოლიციის ხელთ არსებული ოპერატიული ინფორმაციით, აღნიშნული პირი -  მ.ს. ნარკოტიკებს უკანონოდ ასაღებდა.

„პოლიციის ხელთ არსებული ოპერატიული ინფორმაციით, მ.ს. ნარკოტიკებს უკანონოდ ასაღებდა. სამართალდამცველებმა იგი, შესაბამისი საპროცესო მოქმედებების ჩატარების მიზნით, თბილისში, ქავთარაძის ქუჩაზე შეაჩერეს.

პოლიციელებს სამსახურებრივი უფლებამოსილების განხორციელებაში ხელი შეუშალეს პოლიტიკური ცენტრი „გირჩის“ წევრებმა, რომელთა ოფისიც შემთხვევის ადგილის მეზობლად აღმოჩნდა. სამართალდამცველებმა აღნიშნულ მოქალაქეებს არაერთხელ მოუწოდეს წესრიგის დაცვისკენ, თუმცა ისინი არ დაემორჩილნენ პოლიციელების კანონიერ მოთხოვნას. მ.ს. სამართალდამცველებმა პოლიციის შენობაში გადაიყვანეს,  საპროცესო მოქმედებების ჩატარების მიზნით. „გირჩის“ წევრები დაედევნენ პოლიციელებს, აგრძელებდნენ მათთვის სამსახურებრივი მოვალეობის შესრულებაში ხელის შეშლას და მათ სიტყვიერ შეურაცხყოფას აყენებდნენ, რის გამოც 1982 წელს დაბადებული ი.ხ. და 1972 წელს დაბადებული ვ.მ. საქართველოს ადმინისტრაციულ სამართალდარღვევათა კოდექსის 166-ე და 173-ე მუხლებით გათვალისწინებული სამართალდარღვევისთვის დააკავეს, რაც წვრილმან ხულიგნობას და პოლიციის მიმართ წინააღმდეგობას გულისხმობს", - ნათქვამია განცხადებაში.