მოსახლეობის 45% ეთანხმება მოსაზრებას, რომ სამართალდამცველი ორგანოების თანამშრომლები კონკრეტული ადამიანების დაკავების მიზნით, იყენებენ ნარკოტიკული ნივთიერების ჩადების მეთოდს. 35% აღნიშნულ მოსაზრებას არ ეთანხმება. „საერთაშორისო გამჭვირვალობა - საქართველომ“ საზოგადოებრივი აზრის გამოკითხვის შედეგები გამოაქვეყნა. 

რაც შეიძლება შეკითხვას, უნდა მოიხადოს თუ არა ციხის სასჯელი ადამიანმა შემდეგი ტიპის ნარკოტიკული საშუალებების პირადი მოხმარების გამო, მოსახლეობის 72% ამბობს, რომ ციხის სასჯელი არ უნდა იყოს მარიხუანის მოხმარებაზე, 56%-ის აზრით, ციხის სასჯელი არ უნდა იყო კლუბური ნარკოტიკის მოხმარებაზე , 43% კი ფიქრობს, რომ საპატიმრო სასჯელი არ უნდა იყოს ინექციური ნარკოტიკების მოხმარების შემთხვევაში.

„საერთაშორისო გამჭვირვალობა - საქართველომ“ დღეს გამოაქვეყნა საზოგადოებრივი აზრის გამოკითხვის შედეგები, რომელიც ორგანიზაციის დაკვეთით „კავკასიის კვლევითი რესურსების ცენტრმა“ განახორციელა. კვლევის ფარგლებში, რომელიც 2018 წლის 3-28 მარტის პერიოდში ჩატარდა, მთელი საქართველოს მასშტაბით 1843 ადამიანი გამოიკითხა. გამოკითხვის საშუალო ცდომილება 2,8% შეადგენს.