„მესმის ახალგაზრდების, მაგრამ არ შეიძლება ასე ხალაღებით პოლიციელებს დავაბრალოთ ჩადება“, - ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე, სოფო კილაძემ „ტელეკომპანია პირველის“ ეთერში განაცხადა.
„პოლიციის მტკიცებით არსებობს შესაბამისი ვიდეოჩანაწერები , დიდი იმედი მაქვს რომ მას გაასაჯაროებენ, ვგულისხმობ კონკრეტული საპოლიციო ღონისძიებების ამსახველ ვიდეოკადრებს, აქ ვფრთხილობთ სწორედ, არ შეიძლება ასე ხელაღებით პოლიციის დემორალიზება. მაგრამ არც ის შეიძლება გამოვრიცხოთ, რომ არათანაზომიერ შეზღუდვებს უფლებებისას ჰქონდა ადგილი. მნიშვნელოვანი არის სწორი პოზიციის დაჭერა, იმიტომ რომ ეს ყველაფერი საბოლოოდ ჩვენს ქვეყანაზე აისახება, რადგან ეს ძალიან მნიშვნელოვანი, ძალიან მწვავე საკითხია, რომელიც ბევრ ადამიანს ადარდებს. რაც შეეხება მოთხოვნებს, მე არ მგონია რომ ეს იყოს სერიოზული მოთხოვნა, რომ გადადგეს პრემიერ-მინისტრი. არ მგონია რომ ეს სწორი და გამართლებული მოთხოვნა იყოს, იმიტომ რომ პრემიერიც და გიორგი გახარიაც ყველაფერს აკეთებენ, იმისთვის რომ ქვეყანაში ასეთი სიტუაცია არ შეიქმნას“,- განაცხადა სოფო კილაძემ.
************
გუშინ, ღამით 1 საათისთვის კლუბებში „ბასიანსა“ და „გალერიში“ სპეცოპერაცია დაიწყო. კლუბის სტუმრებს დაატოვებინეს ტერიტორია. შინაგან საქმეთა სამინისტრომ განაცხადა, რომ აღნიშნულ კლუბებში 3 თვის განმავლობაში საგამოძიებო მოქმედებები ნარკოტიკული საშუალებების გასაღების ფაქტების გამოსავლენად მიმდინარეობდა.
მათი თქმით, ნარკოტიკული საშუალების გასაღების ბრალდებით 8 პირი დააკავეს.
სპეცოპერაციის დაწყების შემდეგ დინამოს მიმდებარე ტერიტორიაზე სიტუაცია დაიძაბა. სპეცოპერაციის პარალელურად კლუბების მიმდებარე ტერიტორიაზე შეკრებილი მოქალაქეები სპეცოპერაციას აპროტესტებდნენ.
„ლიბერალის“ კადრებში ჩანს, თუ როგორ არბევს სპეცრაზმი მოქალაქეებსა და ხელს უშლის ჟურნალისტებს პროფესიული საქმოანობის შესრულებისას.
შემდგომ, აქციის მონაწილეებმა დინამოს მიმდებარე ტერიტორიიდან საპროტესტო მსვლელობით პარლამენთან გადაინაცვლეს. პროტესტის დროს დააკვეს 50-მდე მოქალაქე. ამ დროისთვის ისინი განთავისუფლებულნი არიან.
დღეს აქცია 3 საათზე განახლდება პარლამენტის წინ.
„თეთრი ხმაურის მოძრაობის“ განცხადებით, მათი მოთხოვნებია: „გადადგეს პრემიერ-მინისტრი გიორგი კვირიკაშვილი; გადადგეს შს მინისტრი გიორგი გახარია; დაისაჯოს პოლიციის ის თანამშრომლები, რომლებიც დარბევაში მონაწილეობდნენ“.
