თბილისის პარლამენტთან შეკრებილი დემონსტრანტების მხარდასაჭერად , სოლიდარობის აქციები გაიმართება ბერლინსა და ვენაში.
„ჩვენ ვიკრიბებით ვენაში რათა თანადგომა გამოვუცხადოთ ჩვენ მეგობრებს, რომლებიც იბრძვიან თავისუფლებისთვის საქართველოში. შემოგვიერთდით თუ ეწინააღმდეგებით სახელმწიფოს ძალადობრივ და თავისუფლების შემზღუდავ პოლიტიკას“,- ნათქვამია აქციის ორგანიზატორთა მიერ გავრცელებულ ინფორმაციაში.
როგორც ბერლინში დაგეგმილი სოლიდარობის აქციის ღონისძიების ტექსტშია ნათქვამი, აქცია მიზნად ისახავს, სოლიდარობა გამოუცხადონ თბილისში ძალადობის წინააღმდეგ შეკრებილ ადამიანებს: „თბილისში, პოლიციის გადამეტებული ძალის გამოყენებით მოხდა კლუბებისBASSIANI და CAFE-GALLERY -ს დარბევა, ასევე უამრავი ადამიანის დაკავება. ბერლინში დაგეგმილი აქცია მიზნად ისახავს სოლიდარობა გამოუცხადოს საქართველოში ძალადობის წინააღმდეგ შეკრებილ ადამიანებს. ერთად ვიბრძოლოთ თავისუფლებისთვის!“
**********
დღეს დილით პარლამენტთან შეკრებილ მოქალაქეებს პოლიციამ კარვები ააღებინა. წუხელ აქციის ორგანიზატორებმა განაცხადეს, რომ საპროტესტო აქცია რუსთაველზე დღეს 15:00 საათზე განახლდება, მაგრამ მათ სთხოვეს ხალხს, ვისაც შეეძლებოდა პარლამენტთან ღამის განმავლობაშიც დარჩენილიყო. პარლამენტის წინ კარვები გაშალეს და შეკრებილი მოქალაქეების ნაწილმა ღამე რუსთაველზე გაათია.
დღეს დილით როგორც აქციის მონაწილეები ამბობენ, სამართალდამცველები მათთან მივიდნენ და კარვების დაშლა მოსთხოვეს.
აქციაზე „ჩვენი თავისუფლებისთვის“ შეკრებილები 12 მაისს ღამის კლუბებში ჩატარებულ სპეცოპერაციას აპროტესტებენ.
სამართალდამცველების თქმით, მათ კლუბებში 8 ნარკორეალიზატორი დააკავეს, თუმცა, როგორც ომბუდსმენსმა განაცხადა მისი ინფორმაციით პოლიციამ ისინი კლუბებში შეწღამდე დააკავა. სამართალდამცველებმა „ბასიანისა“ და „კაფე გალერის“ სტუმრებს კლუბების ტერიტორია დაატოვებინა. ქუჩაში გადმონაცვლებულმა მოქალაქეებმა საპროტესტო აქცია დაიწყეს, პოლიციამ კი აქცია დაარბია და 60-მდე მოქალაქე დააკავა.
