30 მაისს საკონსტიტუციო სასამართლო განიხილავს „გირჩის“ წევრების, ზურაბ ჯაფარიძისა და ვახტანგ მეგრელიშვილის, საკონსტიტუციო სარჩელს.
მოსარჩელეები სადავოს ხდიან მარიხუანის მოხმარებისთვის ადმინისტრაციულ სამართალდარღვევათა კოდექსით გათვალისწინებულ სანქციებს.
კანონის დღეს მოქმედი რედაქციით, მარიხუანის პირველ ჯერზე მოხმარება იწვევს დაჯარიმებას 500 ლარის ოდენობით ან გამასწორებელ სამუშაოებს 1-დან 6 თვემდე ვადით.
2017 წლის 30 ნოემბერს „გირჩის" სარჩელით, საკონსტიტუციო სასამართლომ მარიხუანის მოხმარებისთვის სისხლისსამართლებრივი პასუხისმგებლობის გამოყენება არაკონსტიტუციურად ცნო. ამ გადაწყვეტილების შემდეგ ორგანიზმში მარიხუანის კვალის აღმოჩენის გამო, რამდენჯერაც არ უნდა მოხდეს ეს, ადამიანი სისხლის სამართლის წესით ვეღარ დაისჯება, მაგრამ შეიძლება, დაისაჯოს ადმინისტრაციული წესით.
„გირჩის" ახალი საკონსტიტუციო სარჩელი კი სწორედ მარიხუანის მოხმარებისთვის ადმინისტრაციულ სამართალდარღვევათა კოდექსით გათვალისწინებული მუხლის არაკონსტიტუციურად ცნობას ითვალისწინებს.
