„ტრაფიკ ტრეველის" მმართველი პარტნიორი ცოტნე ჯაფარიძე აღნიშნავს, რომ კლუბ „ბასიანში“ ჩატარებული სპეცოპერაცია იქ მყოფ ერთ-ერთ უცხოელ დიჯეის ტერორისტული აქტი ეგონა და ამიტომაც მომხდარ ფაქტთან დაკავშირებით სოციალურ ქსელში არასწორი ინფორმაცია გაავრცელა. ცოტნე ჯაფარიძის კომენტარს BUSINESS MEDIA ავრცელებს.
„სასაცილოა ტურისტულ უსაფრთხოებაზე საუბარი, იმ დროს, როდესაც ერთ-ერთ ცნობილ ღამის კლუბზე რეიდი ხდება. საუბარია „ბასიანზე“, სადაც მსოფლიოში ცნობილი მუსიკოსები ჩამოდიან. სწორედ მათი და ელექტრონული მუსიკის დამსახურებით, წელს ახალგაზრდა ტურისტთა რაოდენობამ საქართველოში საგრძნობლად იმატა. როდესაც გვაქვს ასეთი ზრდა და იკვეთება ინტერესი განსაკუთრებით კი, მაღალგანვითარებული ქვეყნებიდან, მომხდარი ფაქტი უარყოფითად იმოქმედებს პირველ რიგში ქვეყნის რეპუტაციაზე და შეამცირებს მათ შემოდინებას ქვეყანაში ”,– აცხადებს ცოტნე ჯაფარიძე.
