თბილისში, გუნიას ქუჩაზე „თელასის" თანამშრომლები ასფალტს წვიმაში აგებენ. 

შესაბამისი ვიდეო Facebook-ზე აქტივისტმა ნატა ფერაძემ ატვირთა. ვიდეოში ჩანს, რომ მიუხედავად მითითებისა, რომ წვიმაში დაგებული ასფალტი გაფუჭდება, „თელასის" თანამშრომლები საქმიანობას მაინც განაგრძობენ. 

„ლიბერალს" თბილისის მერიაში უთხრეს, რომ ადგილზე მივიდნენ მერიის ზედამხედველობის სამსახურის თანამშრომლები და ასფალტის დაგება ამ დროისთვის შეჩერებულია. 

„ამ სამუშაოებს აკეთებენ „თელასის" თანამშრომლები. საკომუნიკაციო ქსელი შეცვალეს. ქსელს აწყობდნენ და, შესაბამისად, ნებართვა ექნებოდათ ყველა შემთხვევაში. უნდა გადააგონ გზა, რაც ათხარეს და ამ დროს ეტყობა, წვიმამ მოუსწრო. ამ დროისთვის შეჩერებულია სამუშაოები. ზედამხედველობის სამსახური გავიდა უკვე ადგილზე. მერია არ აკეთებს ამ სამუშაოებს" - ამბობენ მერიაში.

მერიის ზედამხედველობის სამსახურში კი ამბობენ, რომ თუკი ასფალტი ერთი წლის ვადაში დაზიანდება, „თელასს" 10 დღე მიეცემა დაზიანებული გზის აღსადგენად.

„თუ არ მოიყვანენ წესრიგში, შესაბამისი რეაგირების საფუძველზე ჯარიმდებიან" - უთხრეს „ლიბერალს" მერიაში.