საგარეო საქმეთა სამინისტროში საგანგებო ბრიფინგი გაიმართა სირიის მიერ აფხაზეთისა და სამხრეთ ოსეთის დამოუკიდებელ რესპუბლიკებად აღიარების გამო.
სამინისტროს განცხადებით, ასადის რეჟიმმა ამ ნაბიჯით მხარი დაუჭირა რუსულ აგრესიას და უგულებელყო სუვერენული სახელმწიფოს ტერიტორიული მთლიანობა. საპასუხოდ, საქართველომ სირიის არაბთა რესპუბლიკასთან დიპლომატიური ურთიერთობის გაწყვეტის პროცესი დაიწყო.
„ამ ქმედებით ასადის რეჟიმმა მხარი დაუჭირა საქართველოს წინააღმდეგ რუსეთის ფედერაციის სამხედრო აგრესიას, აფხაზეთისა და ცხინვალის რეგიონების უკანონო ოკუპაციას, წლების განმავლობაში მიმდინარე ეთნიკურ წმენდას. სირიის რეჟიმმა უგულებელყო სუვერენული სახელმწიფოს ტერიტორიული მთლიანობა და საერთაშორისო ნორმები.
აღნიშნულის გათვალისწინებით, საქართველომ დაიწყო პროცესი სირიის არაბთა რესპუბლიკასთან დიპლომატიური ურთიერთობების გაწყვეტის მიზნით“ - განაცხადა საგარეო საქმეთა მინისტრის მოადგილემ, დავით დონდუამ.
საქართველოს საგარეო საქმეთა სამინისტრო ასევე მოუწოდებს საერთაშორისო საზოგადოებას, სათანადოდ შეაფასოს ასადის რეჟიმის გადაწყვეტილება და მიიღოს ზომები აღნიშნული ქმედებების საპასუხოდ.
სირიის მიერ აფხაზეთისა და სამხრეთ ოსეთის დამოუკიდებელ რესპუბლიკებად აღიარების შესახებ ინფორმაცია დე ფაქტო რესპუბლიკებმა დღეს გაავრცელეს.
„გილოცავთ ყველას! გამარჯვებისა და დამოუკიდებლობის დღის 25 წლის იუბილესთან დაკავშირებით, ეს არის არაჩვეულებრივი საჩუქარი!“, - წერს აფხაზეთის დე ფაქტო რესპუბლიკის საგარეო საქმეთა მინისტრი დაურ კოვე.
სირიის ხელისუფლებას მადლობა გადაუხადა ე.წ. სამხრეთ ოსეთის პრეზიდენტმა ანატოლი ბიბილოვმაც. „ყველას სჭირდება ახალი მეგობრები, მით უმეტეს იმ ქვეყნებს, რომლებიც მძიმე პირობებში აღმოჩნდნენ, შეეჯახნენ სამხედრო აგრესიასა და ტერორიზმს. დიპლომატიური ურთიერთობების დამყარება ჩვენს ქვეყნებს შორის, დარწმუნებული ვარ, სასარგებლო იქნება სირიისა და სამხრეთ ოსეთისთვის“, - აცხადებს ბიბილოვი.
