პანკისის ხეობაში სპეცოპერაციის დროს მოკლული თემირლან მაჩალიკაშვილის მამამ, მალხაზ მაჩალიკაშვილმა ჟურნალისტებთან გუშინ მის მიერ აქციაზე გაჟღერებულ განცხადებაზე კომენტარი გააკეთა.
გუშინ მაჩალიკაშვილმა თქვა, რომ რამდენიმე ადამიანთან ერთად მას გადაწყვეტილი ჰქონდა სუს–ში თავის აფეთქება, დღეს კი განმარტა, რომ ეს ემოციების გამო თქვა.
„დიდ ღმერთს ვფიცავარ, ალაჰს ვფიცავარ, თემირლანს რომ მოსვლოდა საქართველოს წინააღმდეგ რაიმეს გაკეთება აზრად, ჩემი ხელით დავახრჩობდი. მე ათასჯერ ჩავხედე სიკვდილს თვალებში, მე არ ვარ ის ადამიანი... მე ჩეჩენი კაცი ვარ, ქართული კულტურით გაზრდილი. მე სხვა ადამიანებისგან განსხვავებით მიყვარს ეს საქართველო.
მე ორჯერ მომიკლეს შვილი, ჩემთვის მოკვლაზე უფრო მძიმე მისი ტერორიზმში დადანაშაულებაა. ერთი წელი გარეთ არ გამოსულა. ფული შევაგროვე, რომ ოპერაცია გაეკეთებინა და გარეთ გამოსულიყო. ამათ კიდევ საწოლში ჩამიცხრილეს და ტერორიზმში დაადანაშაულეს. ამის მერე კიდევ მეუბნებიან, ეს რატომ თქვიო, ეს განცხადება რატომ გააკეთეო. ამ მუსლიმ კაცს თუ რაღაც წამომცდა, ამაზე კუდი მოაბეს.
ეს არ არის კარგი საქციელი. შესაძლოა, ემოციურად გამომივიდა. შესაძლოა, ნებისმიერი ჩემს ადგილას ასე მოქცეულიყო, მაგრამ ეს რომ ჩემს ჩეჩენ ხალხს გაეკეთებინათ ჩემთვის, მე მართლა ავიფეთქებდი თავს და თემირლანს გავაყოლებდი ერთ ათას ადამიანს, მაგრამ მე ქართველ ხალხს არ გავუკეთებ და არც გავუკეთებდი“, -თქვა მაჩალიკაშვილმა.
