„დღეს რუსთაველის გამზირზე დააკავეს ყაზახეთის რესპუბლიკის მოქალაქე, ინტერპოლის წითელი ცირკულარით მკვლელობისა და ყაჩაღობისთვის ძებნილი პირი" - ამის შესახებ ცოტა ხნის წინ შინაგან საქმეთა სამინისტროში გამართულ ბრიფინგზე განაცხადეს.
შსს-ს ინფორმაციით, აღნიშნული პირი სამართალდამცველებმა იმ დროს შეაჩერეს, როცა რუსთაველის გამზირზე არსებულ აქციას ურთდებოდა.
„პიროვნების იდენტიფიცირებისას, მოქალაქემ პოლიციას წინააღმდეგობა გაუწია. არ დაემორჩილა მათ კანონიერ მოთხოვნას, რის გამოც ადგილზე დააკავეს. შემოწმებისას მას ცივი იარაღი - დანა აღმოაჩნდა" - აცხადებენ შსს-ში.
სამინისტროს ინფორმაციით, რუსთაველის გამზირზე დღეს პოლიციამ სხვა ძებნილიც დააკავა.
„სამართალდამცავებმა პარლამენტის წინ გაშლილ კარავში ქურდობისთვის ძებნილი 1994 წელს დაბადებული პირი იმ დროს დააკავეს, როცა აქციის მონაწილეებს შორის შელაპარაკება მოხდა. იგი 5 ივნისიდან ქურდობის ფაქტზე იძებნებოდა" - აცხადებენ შსს-ში.
მათივე თქმით, კარავში აქციის მონაწილეებს შორის ურთიერთშელაპარაკებისას ასევე დაკავებულია ქურდობისთვის ნასამართლევი, ამჟამად პირობითი მსჯავრის ქვეშ მყოფი 1996 წელს დაბადებული პირი.