აშშ-ის პრეზიდენტი დონალდ ტრამპი და ჩრდილო კორეის ლიდერი კიმ ჩენ ინი ისტორიულ სამიტზე ერთმანეთს შეხვდნენ.
მოლაპარაკების დაწყებამდე ლიდერები ერთმანეთს მიესალმნენ. „ძალიან კარგად ვგრძნობ თავს. ჩვენ ძალიან მნიშვნელოვანი საუბარი გვექნება და წარმატებულიც“, - განაცხადა ტრამპმა. ჩრდილო კორეის ლიდერმა უპასუხა, რომ იქ ყოფნა მისთვის ადვილი არ არის, მაგრამ, მისივე თქმით, დარწმუნებულია, რომ გადალახავენ ამ დაბრკოლებებს.
ამის შემდეგ ლიდერები ერთმანეთს პირისპირ შეხვდენენ და 40 წუთის განმავლობაში საუბრობდნენ. შემდეგ მათ დელეგაციის სხვა წევრებიც შეუერთდნენ.
ლიდერებმა სამიტზე ქვეყნებს შორის დაძაბულობის განმუხტვისა და ბირთვული განიარაღების საკითხები განიხილეს, შემდეგ კი ლიდერებმა ხელი მოაწერეს დოკუმენტს, ერებს შორის ახალი ურთიერთობის დაწყებისთვის. ამ დოკუმენტის მიხედვით, ფხენიანმა უნდა იმუშაოს სრულ, შეუქცევად ბირთვულ განიარაღებაზე, რაც აშშ-ის მოთხოვნაა.
როგორც BBC წერს, შეხვედრის შემდეგ ლიდერებმა მცირე კომენტარი გააკეთეს მედიასთან, მაგრამ არაფერი თქვეს დოკუმენტზე, რომელსაც ხელი მოაწერეს.
„ვფიქრობ, ორივე მხარისთვის შედეგი იქნება შთამბეჭდავი“, - განაცხადა დონალდ ტრამპმა. მან ასევე თქვა, რომ მზად არის, კიმ ჩენ ინი მიიწვიოს თეთრ სახლში.
„ჩვენ გადავწყვიტეთ, წარსული უკან დავტოვოთ. მსოფლიო დიდ ცვლილებეს იხილავს“, - განაცხადა კიმ ჩენ ინმა.
