„ნაციონალური მოძრაობის“ წევრის რომან გოცირიძის თქმით, მისი პარტია პარლამენტში საზოგადოებრივი მაუწყებლის სამეურვეო საბჭოს გამოწვევის საკითხს დააყენებს. გოცირიძემ საფინანსო-საბიუჯეტო კომიტეტის სხდომაზე, სადაც საზმაუს 2017 წლის ანგარიშს განიხილავდნენ, მაუწყებლის სამეურვეო საბჭო გააკრიტიკა.
„ჩვენ გამოვდივართ ინიციატივით, რომ მაუწყებლობის შესახებ კანონის შესაბამისად სამეურვეო საბჭო იქნეს გამოწვეული. მოხდეს ახალი საბჭოს ფორმირება და ამის შემდეგ იმედია, რეალურ რეფორმებს დავიწყებთ იმ სტრუქტურაში, სადაც იხარჯება 50 მილიონი ჩვენი გადასახადის გადამხდელთა ფულიდან“, - თქვა რომან გოცირიძემ.
გოცირიძის თქმით, მიუხედავად იმისა, რომ საბჭოს წევრებს პარლამენტის დეპუტატებზე მეტი ხელფასები აქვთ, ისინი რეალურად არ მუშაობენ, არ აქვთ განსაზღვრული დღის წესრიგი, შიდა დისციპლინა და ანაზღაურებას მუშაობის გარეშე იღებენ.
