ესპანეთის ფეხბურთის ფედერაციის გადაწყვეტილებით, ნაკრების მთავარი მწვრთნელი იულიენ ლოპეტეგი თანამდებობიდან გაათავისუფლეს.
მიზეზი ლოპეტეგსა და „მადრიდის რეალს“ შორის მიღწეული შეთანხმება გახდა. დღეს დილით „რეალმა“ გაავრცელა ინფორმაცია, რომ ლოპეტეგი მუნდიალის დასრულების შემდეგ კლუბის მთავარი მწვრთნელი გახდებოდა.
მსოფლიო ჩემპიონატის დაწყებამდე ასეთი შეთანხმება მიუღებლად მიიჩნია ესპანეთის ფეხბურთის ფედერაციამ და ლოპეტეგი დაითხოვა. „ჩვენ იძულებულები გავხდით, ასეთი ნაბიჯი გადაგვედგა. ლოპეტეგს წარმატებებს ვუსურვებთ“, - განაცხადა ესპანეთის ფეხბურთის ფედერაციის პრეზიდენტმა, ლუის რუბიალესმა.
მსოფლიო ჩემპიონატი, რომლის ერთ-ერთ ფავორიტად ესპანეთი მიიჩნევა, ხვალიდან იღებს სტარტს. ესპანეთის ნაკრები კი, რომელიც უმწვრთნელოდ დარჩა თავის პირველ მატჩს 2 დღეში გამართავს.
იულიენ ლოპეტეგი „მადრიდის რეალში“ ზინედინ ზიდანს ჩაანაცვლებს, რომელმაც 2-ნახევარი წლის შემდეგ „რეალის“ მთავარი მწვრთნელის თანამდებობა თავისი სურვილით დატოვა.