სახალხო დამცველი ნინო ლომჯარია შინაგან საქმეთა ყოფილი მინისტრის, ვანო მერაბიშვილის ციხიდან გაყვანის საქმეზე შს სამინისტროსგან გამოძიების დაწყებას მოითხოვს. ამის შესახებ ომბუდსმენმა ტელეკომპანია „პირველის“ ეთერში ისაუბრა.
ნინო ლომჯარია ამბობს, რომ ვანო მერაბიშვილის ციხიდან გაყვანის საქმე გამოსაძიებელია და ამას სახელმწიფო გვერდს ვერ აუვლის.
„შესწავლილი მაქვს ყველა საქმე, რომლებზეც სტრასბურგის სასამართლომ მე-18 მუხლის დარღვევა დაადგინა და ყველა ასეთ საქმეზე სტრასბურგი საქართველოს ეუბნება, რომ უნდა გამოიძიოთ, დაადგინოთ და პასუხისგებაში მისცეთ ყველა ის პირი, ვინც ამაში მონაწილეობდა.
ქვეყანა აქ ასე მარტივად ვერ გამოძვრება, თუ პრეცედენტებს მივყვებით, სტრასბურგი, ალბათ, ძალიან მალე იტყვის, რომ ეს საქმე უნდა იყოს გამოძიებული. ჩვენ ამ კვალს მივყავართ ოთარ ფარცხალაძესთან, რომლის არაფორმალურ გავლენებზეც პროკურატურაში, ყველა ინფორმირებული ვართ. გავიხსენოთ ყოფილ გენერალურ აუდიტორზე თავდასხმის ფაქტი, სადაც ის ფიგურირებს და ეს საქმე გამოუძიებელია. ხორავას ქუჩის ინციდენტშიც იჩინა თავი.
სახელმწიფოს მაინც აქვს გამოსაძიებელი და დასადგენი, ვინ გაიყვანა და სად გაიყვანეს ვანო მერაბიშვილი. მივმართავ შინაგან საქმეთა სამინისტროს, რომ დაიწყოს გამოძიება და გამოიძიონ. ეს იქნება ერთ-ერთი ნაბიჯი, რითაც ამ მითქმა-მოთქმას პასუხს გასცემენ - დაადასტურებენ ან უარყოფენ. მაგრამ ფაქტია, რომ აზრი არსებობს და ამ კაცის სახელი და გვარი, როგორც არაფორმალური გავლენის მქონე ადამიანის, ბევრ საქმეში ფიგურირებს“, - განაცხადა ნინო ლომჯარიამ.
