22 წლის დემურ სტურუას თვითმკვლელობამდე მიყვანაში ბრალდებული ყოფილი პოლიციელი გოდერძი თევზაძე ქუთაისის სააპელაციო სასამართლომაც გაამართლა. 

პოლიციელის მიმართ გამამართლებელი განაჩენი პირველი ინსტანციის სასამართლომ 2017 წლის 9 ივნისს გამოიტანა, რის შემდეგაც პროკურატურამ ის ზემდგომ ინსტანციაში გაასაჩივრა.

22 წლის დემურ სტურუამ სიცოცხლე თვითმკვლელობით 2016 წლის 8 აგვისტოს დაასრულა. მან წერილი დატოვა, სადაც გოდერძი თევზაძის მხრიდან ძალადობასა და მუქარაზე საუბრობდა. 

დემურ სტურუას თვითმკვლელობის ფაქტზე პროკურატურამ გოდერძი თევზაძეს ბრალი წაუყენა

პროკურატურამ თევზაძეს ბრალი 2016 წლის 29 აგვისტოს წაუყენა. 

„საქართველოს პროკურატურამ ჩატარებული გამოძიების შედეგად მოპოვებული მტკიცებულებების საფუძველზე გამოიტანა დადგენილება შსს-ს სამტრედიის რაიონული სამმართველოს უბნის ინსპეტორ-გამომძიებლის გოდერძი თევზაძის ბრალდების შესახებ, სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ფაქტზე, დანაშაული გათვალისწინებული სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტითა და 115-ე მუხლით“.