თბილისის მერია ჭავჭავაძის გამზირის რეაბილიტაციას და ველობილიკის მოწყობას გეგმავს. მუნიციპალიტეტმა საპროექტო დოკუმენტაციის შესადგენად 48 000 ლარის ღირებულების ტენდერი გამოაცხადა.
სატენდერო დოკუმენტის მიხედვით, ვაკეში ჭავჭავაძის გამზირის გზის საფარის რეაბილიტაცია უნდა მოხდეს. გზის რეაბილიტაციის გარდა, თბილისის მერია ჭავჭავაძეზე გზის ორივე მხარეს ველობილიკის მოწყობასაც გეგმავს, რომლის საერთო სიგანე 3 მეტრი იქნება, ხოლო სიგრძე დაახლოებით 2.4 კილომეტრი. საპროექტო
სატენდერო დოკუმენტის მიხედვით, გზაზე ასევე აუცილებელია შშმ პირთათვის ადაპტირებული გადასასვლელებისა და ტროტუარების მოწყობაც.
საპროექტო წინადადებების მიღება 3 ივლისს დასრულდება. გამარჯვებულმა კომპანიამ გამზირის რეაბილიტაციის გეგმა ორთვიან ვადაში უნდა შეადგინოს. სამუშაოს დასრულების ვადა ჯერ უცნობია.
თბილისის მერიამ ქალაქში ერთი ველობილიკი პეკინის ქუჩაზე, მისი რეაბილიტაციის შემდეგ მოაწყო. ველობილიკის მოწყობა იგეგმება საბურთალოს რაიონის სხვა ქუჩებზეც, თუმცა მერიის გამოცხადებული ტენდერი ჯერჯერობით ჩავარდა.