საქართველოს პრემიერ-მინისტრის, მამუკა ბახტაძის განცხადებით, საქსტატის მონაცემებით, საქართველოს ეკონომიკურმა ზრდამ მაისში 7.5%-ს მიაღწია. მისი თქმით, ეს ადასტურებს იმას, რომ მთავრობამ სწორ ეკონომიკურ პოლიტიკას ატარებს. 

„რამდენიმე წუთის წინ „საქსტატმა“ გამოაქვეყნა ახალი მონაცემები და საქართველოს ეკონომიკურმა ზრდამ მაისში 7,5%-ს მიაღწია. ასეთი მაჩვენებელი იმის დასტურია, რომ მთავრობა სწორ ეკონომიკურ პოლიტიკას ატარებს. ეს ასევე იმის დადასტურებაა, რომ ის რეფორმები, რომლებიც ჩვენ განვახორციელეთ და რომლებიც დავაანონსეთ, ქმნის ისეთ გარემოს, სადაც ეკონომიკური ზრდის ტემპები აუცილებლად იქნება დაჩქარებული. ასევე მინდა აღვნიშნო, რომ ეკონომიკური ზრდის ხარისხობრივი ეფექტიც არის გაუმჯობესებული“, - განაცხადა მამუკა ბახტაძემ.

საქსტატის მონაცემებით, 2018 წლის მაისში რეალური მთლიანი შიდა პროდუქტის ზრდის ტემპმა 7,5 პროცენტი შეადგინა, ხოლო 2018 წლის პირველი ხუთი თვის საშუალო რეალური ზრდა 6,1 პროცენტი დაფიქსირდა.