საქართველოს მთავრობის საპარლამენტო მდივანი ნათია მიქელაძემ იურიდიული კომიტეტის სხდომაზე განაცხადა, რომ განათლების, კულტურისა და სპორტის სამინისტროს დასახელებას მეცნიერება დაემატება.
„დღეს სესიაზე იყო მოსაზრება ერთ მუხლთან დაკავშირებით, სადაც სამინისტროების ჩამონათვალია გაკეთებული. განათლების, კულტურისა და სპორტის სამინისტროზე სადაც არის საუბარი, ჩვენ გვქონდა ამასთან დაკავშირებით კონსულტაციები და ჩვენი პოზიციაა, რომ დასახელებას მეცნიერება დაემატოს. ფორმულირება ალბათ განათლების მეცნიერების, კულტურისა და სპორტის სამინისტრო იქნება, შესაძლებელია მეცნიერება, განათლება, კულტურა, სპორტი – შეიძლება ამაზეც ვიმსჯელოთ“, – განაცხადა ნათია მიქელაძემ კომიტეტის სხდომაზე.
პარლამენტმა პირველი მოსმენით მთავრობის სტრუქტურული რეორგანიზაციის შესახებ საკანონმდებლო პაკეტი დაამტკიცა. “საქართველოს მთავრობის სტრუქტურის, უფლებამოსილებისა და საქმიანობის წესის შესახებ“ კანონში შესატანი ცვლილებები 84 ხმით მიიღეს. წინააღმდეგ ხმა სამმა დეპუტატმა მისცა.
