ქვემო ქართლის მხარის გუბერნატორის ადმინისტრაციამ გაავრცელა ვიდეორგოლი, რამაც სოციალურ ქსელში საზოგადოების უკმაყოფილება გამოიწვია. მოქალაქეები აცხადებენ, რომ გავრცელებული ვიდეოში არ არის ასახული არამართლმადიდებლური საკულტო ნაგებობები და ვიდეო ქმნის შთაბეჭდილებას, რომ თითქოს ეს მხარე მონოეთნკურია.
„ლიბერალი“ დაუკავშირდა გუბერნატორის პრესსამსახურს. შეკითხვაზე - რატომ არ მოხვდა ვიდეორგოლში ეთნიკურ უმცირესობებთან დაკავშირებული კადრები - გვიპასუხეს, რომ ეს არის დრონის კადრები, რომელიც სხვადასხვა დროს სხვადასხვა მუნიციპალიტეტის მიერაა გადაღებული და არსებული ვიდეო დამონტაჟდა იმ რესურსით, რა მასალაც შეგროვდა და ეს არ არის საიმიჯო ვიდეორგოლი.
„ჩვენ იქვე ვწერდით. არ ვიცი, რატომ ვერ გაიგეს ამ ადამიანებმა. თავიდანვე განვმარტეთ, რომ ეს მასალა არ ასახავს რეგიონს სრულად. გამოყენებულია დრონით გადაღებული კადრები. მოგეხსენებათ მუნიციპალიტეტებს არ აქვს ფუფუნება, რომ დრონით გადაღებული კადრები ჰქონდეს არქივში ასე ვრცლად. ვიდეო დამონტაჟებულია იმ კადრებით, რა რესურსიც გვქონდა. ქვემო ქართლის მხარეში შედის 7 მუნიციპალიტეტი და კადრებიც სხვადასხვა დროსაა გადაღებული. ის არ ასახავს სრულად ამ მხარეს. აქ ასევე არ არის შესული ქართული ძეგლებიც სრულად. ბალანსი არ არის. რა კადრებიც გვქონდა, ის გამოვიყენეთ. როცა ვიდეომ უკმაყოფილება გამოწვია, ჩვენ ვთხოვეთ მოქალაქეებს, რომ თუ აქვთ მათ კადრები, მოეწოდებინათ და ამას სიამოვნებით გავაკეთებდით“, - განაცხადეს ქვემო ქართლის გუბერნატორის ადმინისტრაციაში.
ადმინსტრაციაში აცხადებენ, რომ აპრილში გაიმართა ფორუმი, რის ფარგლებშიც გაკეთდა პრეზენტაცია, რაც სრულად ასახავს ქვემო ქართლის მხარის ღირსშესანიშნაობებს და აღნიშნული პრეზენტაცია განთავსებულია ვებგვერდზე.
