„ეს არის ბიზნესზე უდიდესი დარტყმა“, - ამის შესახებ სასტუმრო „ველმონდის“ (ყოფილი „ლეო გრანდის“) იურისტმა კახაბერ წერეთელმა ჟურნალისტებთან საუბრისას განაცხადა.

„საგანგებო სიტუაციების მართვის სამსახურის მიმართვა სასამართლოსადმი მოულოდნელი იყო. ყოველდღიურ რეჟიმში მათთან თანამშრომლობა მიმდინარეობდა. რაიმე წერილობითი შეტყობინება სასტუმროს არ ჩაბარებია. სეზონზე ეს არის ბიზნესისთვის უდიდესი დარტყმა - ეს არის ფაქტი. აუცილებელი მოთხოვნები დაცულია, სხვანაირად არცერთი სტუმარი სასტუმროში არ იქნება. ფაქტი არის ის, რომ ეს ბიზნესს არ წაახალისებს", - განაცხადა კახაბერ წერეთელმა.

საგანგებო სიტუაციების მართვის სამსახური სასტუმრო და სამორინე „ველმონდის” (ყოფილი „ლეო გრანდი”) შენობის ექსპლუატაციის შეჩერებას მოითხოვს.

როგორც სამსახურის მიერ გავრცელებულ განცხადებაშია ნათქვამი, ​საგანგებო სიტუაციების მართვის სამსახურის სპეციალისტებმა, 2018 წელს სასტუმროსა და სამორინეში სახანძრო უსაფრთხოების მიზნით სამჯერ განახორციელეს (დეტალური, საკონტროლო და მიზნობრივი) სახანძრო-ტექნიკური შემოწმება. გაიცა 43 რეკომენდაცია, რომელთა უმეტესობა არ შესრულებულა. 

საგანგებო სამსახური ყოფილი სასტუმრო „ლეო გრანდის” შენობის ექსპლუატაციის შეჩერებას მოითხოვს