„მთავრობის სტრუქტურის ცვლილებების ფარგლებში, წლის ბოლომდე უწყებების ავტოპარკი შემცირდება დაახლოებით 1000 ავტომობილით" - ამის შესახებ პრემიერ-მინისტრმა მამუკა ბახტაძემ დღეს გამართულ ბრიფინგზე ისაუბრა.
ბახტაძის თქმით, აღნიშნული მანქანები რეალიზაციისთვის ფინანსთა სამინისტროს გადაეცემა. ამასთან, მათ მაგივრად სპეციალურ ავტომობილებს შეიძენენ „პატრულისთვის, გარემოსდაცვითი ოპერაციებისთვის და მსგავსი სპეციალური საჭიროებებისთვის, რათა ჩვენმა ორგანოებმა შეძლონ უკეთ ფუნქციონირება"
პრემიერის თქმით, მნიშვნელოვნად შეიზღუდება იმ პირთა წრე, რომელთაც აქვთ პერსონალური ავტომობილით სარგებლობის უფლება. ბახტაძე ამბობს, რომ დაახლოებით 500 მიკუთვნებული ავტომანქანა გადაინაცვლებს ე.წ. სამორიგეო პარკში.
„ეს არის პირველი ნაბიჯი და ჩვენ აუცილებლად მოვაყოლებთ სხვა ინიციატივებს ამ საკითხზე, რომელიც გულისხმობს ერთიანი პარკის და მისი მენეჯმენტის შექმნის იდეას, რომელიც უფრო მეტ ოპტიმიზაციას გააკეთებს და საშუალებას მოგვცემს, კიდევ უფრო დავზოგოთ ხარჯები" - თქვა პრემიერმა.
