ფოთისა და ხობის მიტროპოლიტის განცხადებით, დეკანოზ გიორგი მამალაძის საქმეს საგამოძიებო უწყებებმა საფუძვლიანად უნდა გადახედონ, ხოლო თავად მამალაძეს უნდა მიეცეს საშუალება, სინოდს პირადად მოახსენოს ის, რისი გაცხადებაც საჯაროდ არ სურს.
ამის შესახებ განცხადება ფოთისა და ხობის მიტროპოლიტის სამდივნომ მას შემდეგ გაავრცელა, რაც სინოდის წევრებმა ფოთისა და ხობის მიტროპოლიტმა გრიგოლმა და მესტიისა და ზემო სვანეთის მიტროპოლიტმა ილარიონმა დეკანოზი გიორგი მამალაძე მისივე თხოვნით მოინახულეს.
გიორგი მამალაძე, მიტროპოლიტის განცხადებით, გასამართლებულია ე.წ. „ციანიდის“ საქმესთან დაკავშირებით და მისჯილი აქვს თავისუფლების აღკვეთა ცხრა წლის ვადით, მაგრამ მისი მონათხრობის შემდეგ მიტროპოლიტები მიიჩნევენ, რომ „ციანიდის“ საქმეს საფუძვლიანი გადახედვა სჭირდება.
„მოცემული საქმის მიმართ არსებული დიდი ინტერესიდან გამომდინარე, საზოგადოებას ვაცნობებთ, რომ დეკანოზ გიორგი მამალაძისგან მღვდელმთავრებმა მიიღეს საქმესთან დაკავშირებული საკმაოდ მნიშვნელოვანი და მრავალმხრივ გასათვალისწინებელი ინფორმაცია.
საუბრის შინაარსიდან გამომდინარე, მღვდელმთავრები მიიჩნევენ, რომ უნდა მოხდეს მსჯავრდებული სასულიერო პირის საქმის საფუძვლიანი გადახედვა შესაბამისი საგამოძიებო ორგანოების მიერ; ასევე მიიჩნევენ, რომ დეკანოზ გიორგი მამალაძეს, საეკლესიო წესების თანახმად, უნდა მიეცეს საშუალება, როგორც სასულიერო პირმა, წმიდა სინოდს პირადად მოახსენოს ყოველივე ის, რის საჯაროდ გაცხადებასაც პრინციპულად დაუშვებლად მიიჩნევს, მიუხედავად დიდი საზოგადოებრივი ინტერესისა.
მეუფეთა აზრით, უშუალოდ პატიმრისგან მიღებული ინფორმაცია, რაგინდ მძიმე იყოს იგი მოსასმენად, წმიდა სინოდის წევრებს, მათი მაღალი სულიერი მსახურებიდან გამომდინარე, დაანახებს იმ მდგომარეობის მთელ ტრაგიზმს, რომლის მსხვერპლიც აღმოჩნდა დეკანოზი გიორგი მამალაძე“, - ნათქვამია განცხადებაში.
