ჩრდილო კორეამ აშშ-ს 55 ჯარისკაცის ნეშტი დაუბრუნა, რომლებიც კორეის ომში დაიღუპნენ და ამ დრომდე იქ იყვნენ დაკრძალულები.
ამერიკელ ჯარისკაცთა ნეშტები ჩრდილო კორეის დელეგაციამ სამხრეთ კორეაში აშშ-ის ბაზას გადასცა. რეპატრიაციაზე კიმ ჩენ ინი და დონალდ ტრამპი ივნისში, სინგაპურის სამიტზე შეთანხმდნენ. პროცესი, სავარაუდოდ, გაგრძელდება და ამერიკელებს 1950-1953 წლების კორეის ომში დაღუპულ და ტყვედ ჩავარდნილ სხვა პირთა ნეშტებსაც დაუბრუნებენ.
„ძნელია ცხოვრება, როცა არ იცი შენი საყვარელი ადამიანის ბედი“, - უთხრა BBC-ს ერთ-ერთი ჯარისკაცის შვილმა, რომელსაც იმედი გაუჩნდა, რომ 65 წლის შემდეგ მამის დატირებას შეძლებს.
სინგაპურის სამიტს, რომელზეც აშშ-სა და ჩრდილო კორეის ლიდერები კორეის ნახევარკუნძულის ბირთვულ განიარაღებაზე შეთანხმდნენ, ბევრი აკრიტიკებდა და მიიჩნევდნენ, რომ ეს შეთანხმება არ შესრულდებოდა. თუმცა რეპატრიაცია სწორედ სინგაპურის შეთანხმების ერთ-ერთი ნაწილი იყო.
ჯონ ზიმერლიმ, რომელიც კორეაში დაღუპული ერთ-ერთი ჯარისკაცის შვილია და იკვლევს კორეის ომს, BBC-ს განუცხადა, რომ რეპატრირებულ 55 ნეშტს შორის შესაძლოა ამერიკელები არც აღმოჩნდნენ.
„ეს არის იმ ხალხის ნეშტები, რომლებსაც ჩრდილოკორეელები მტრებად მიიჩნევენ, მაგრამ მათ შორის შეიძლება იყვნენ ბრიტანელები, ავსტრალიელები, ბელგიელები ან სხვა ქვეყნის ჯარისკაცები“, - თქვა ზიმერლიმ. მკვლევარი მიიჩნევს, რომ ნეშტების იდენტიფიცირებას რამდენიმე წელი დასჭირდება.
კომუნისტების წინააღმდეგ კორეის ომში 326 000 ამერიკელი იბრძოდა სამხრეთელთა მხარდამხარ. მათგან 5 300 ჯარისკაცი დღემდე დაკარგულად ითვლება. აშშ-ს კოალიციიდან სულ 33 000-მდე ჯარისკაცი დარჩა ჩრდილო კორეის მიწაზე. მიიჩნევა, რომ მათი ნაწილი ტყვეთა ბანაკებშია დამარხული, ნაწილი დიდი შეტაკებების ადგილას, ზოგი კი კორეის ორი რესპუბლიკის გამყოფ, დემილიტარიზებულ ზონაში.