გავრცელებული ვიდეოს საფუძველზე, რომელშიც სავარაუდოდ ტერორისტული დაჯგუფება ქართულ ხელისუფლებას შურისძიებით ემუქრება, სახელმწიფო უსაფრთხოების სამსახური საგამოძიებო მოქმედებებს აწარმოებს - ამის შესახებ „ლიბერალს" სუს-ში განუცხადეს.
ვიდეოში, რომელიც „პალიტრანიუსმა" გაავრცელა, ქართულენოვანი წარწერები ახლავს. ვიდეოში ნათქვამია, რომ მათ ორი ძმა მოუკლეს, რომ ახსოვთ გაბრიელ სალოსოს ქუჩაზე ჩატარებული სპეცოპერაცია და „მეომრები მზად არიან შურისძიებისთვის".
„ამ ვიდეოს შესახებ სახელმწიფო უსაფრთხოების სამსახურისთვის ცნობილი იყო და მიმდინარეობს საგამოძიებო მოქმედებები" - ამბობენ სუს-ში.
სახელმწიფო უსაფრთხოების სამსახურში არ იძლევიან დამატებით ინფორმაციას ვიდეოს გავრცელების დროისა და წარმომავლობის შესახებ, თუმცა „პალიტრანიუსის" ინფორმაციით, ვიდეო სავარაუდოდ 2 კვირის წინ დამზადდა.
