თურქეთის ცენტრალური ბანკი აცხადებს, რომ ლირის სტაბილურობის შესანარჩუნებლად ყველა ზომას მიმართავს. ცენტრალური ბანკის განცხადებით, უზრუნველყოფილი იქნება  ბანკების ლიკვიდურობა.

თურქეთის ცენტრალური ბანკის ამ განცხადებამდე ლირა დოლართან მიმართებაში 9%-ით იყო გაუფასურებული, ხოლო უკვე დღეს დილით - 6%-ით. ამჟამინდელი მონაცემებით, ერთი დოლარი 6.88  თურქული ლირა ღირს. 

თურქეთსა და აშშ-ს შორის ურთიერთობა თურქეთში ამერიკელი პასტორის, ენდრიუ ბრანსონის დაპატიმრებამ გაამწვავა. 

ანკარა მას  ჯაშუშობასა და 2016 წლის სამხედრო გადატრიალების მცდელობის ორგანიზატორად მიჩნეულ ოპოზიციონერ  ფეტულა გიულენთან კავშირში ადანაშაულებს.

ბრანსონის დაკავების პასუხად დონალდ ტრამმა გააორმაგა ტარიფები ფოლადსა და ალუმინზე, რამაც ლირის სწრაფი გაუფასურება გამოიწვია. 

თურქეთის პრეზიდენტმა, რეჯეფ ტაიფ ერდოღანმა პარასკევს მოსახლეობას მოუწოდა, რომ დოლარი და ოქრო გაყიდონ და ლირა იყიდონ. მიმართვის დროს ერდოღანმა ასევე განაცხადა: „მათ აქვთ თავიანთი დოლარი, ჩვენ კი - ალაჰი“.

როგორც BBC წერს, თურქეთის შინაგან საქმეთა მინისტრის განცხადებით, სამართლებრივი მოქმედებები დაიწყება სოციალური მედიის 346 მომხმარებელთან, რომლებიც, მათი თქმით, წერდნენ ლირის გაუფასურებაზე „პროვოკაციული გზებით“.