ბერლინის პოლიციამ რუსეთის მოქალაქე, 31 წლის მაგომედ ალი ტერაქტის მომზადების ბრალდებით დააკავა. გერმანიის მთავარი პროკურატურის განცხადებით, დაკავებული, რომელიც რადიკალი ისლამისტია, გეგმავდა „მასშტაბურ ძალადობის აქტს სახელმწიფოს წინააღმდეგ“. ინფორმაციას Deutsche Welle ავრცელებს.
მაგომედ ალი ასევე დაკავშირებული იყო კლემენტ ბ.-თან რომელიც შარშან მარსელში ტერორისტული აქტების მომზადების ბრალდებით დააპატიმრეს. 22 წლის კლემენტს დაკავებისას ასაფეთქებელი მოწყობილობები და ფეთქებადი ნივთიერებები აღმოუჩინეს.
რაც შეეხება დაკავებულ მაგომედ ალის, გერმანული პრესის ინფორმაციით, პოლიცია მას დიდი ხნის განმავლობაში აკვირდებოდა. დაკავებული მათი ცნობით, უახლოეს ხანებში ტერაქტს არ გეგმავდა, თუმცა სახლში ინახავდა ფეთქებად ნივთიერებებს. სამართალდამცველებმა ნივთმტკიცებების ამოღებისთვის ალის სახლში ჩხრეკა ჩაატარა.