საქართველოს პრემიერ-მინისტრ მამუკა ბახტაძის განცხადებით, საქართველოს ტერიტორიული კონფლიქტების გადწყვეტას სჭირდება პოლიტიკური ნება და ამ მხრივ, დიალოგს ალტერნატივა არ აქვს.

ბახტაძე მიიჩნევს, რომ პოლიტიკური ნების შემთხვევაში არ იქნება რთული იმ მექანიზმის გამოძებნა, რომელიც საქართველოს საშუალებას მისცემს, ტერიტორიული მთლიანობის პრობლემა მშვიდობიანად მოაგვაროს.

„ხალხთაშორის ურთიერთობები მართლაც ძალიან კარგია. ეს ნიშნავს, რომ არსებობს ფუნდამენტი პოლიტიკური, სამშვიდობო გადაწყვეტილებისთვის, რომელიც ამ ყველაფერს სამართლიანად დაარეგულირებს. არსებობს საერთაშორისო სამართალი, ხელმოწერილი დოკუმენტები და მათ შესრულებას სჭირდება პოლიტიკური ნება.

ჩვენ მოხარულები ვართ, რომ ჩვენი მეგობარი ქვეყნები - აშშ, გერმანია, ევროკავშირი რუსეთთან აწარმოებენ დიალოგს ბევრ საკითხზე. რადგან დიალოგს არ გააჩნია ალტერნატივა. ჩვენ დარწმუნებულები ვართ, რომ ერთობლივი ძალისხმევით მივაღწევთ საწადელს“, - განაცხადა მამუკა ბახტაძემ გერმანიის კანცლერთან ერთობლივი პრესკონფერენციის დროს.

პრემიერის თქმით, მისთვის ყველაზე დიდი ტკივილია, რომ ოკუპირებულ ტერიტორიებზე მცხოვრებ ადამიანთა რაოდენობა სულ უფრო მცირდება.

„აფხაზეთში ომის დაწყებამდე 530 000 ადამიანი ცხოვრობდა, დღეს კი 100 000-ზე ოდნავ მეტი მოსახლე ცხოვრობს. 4-ჯერ, 5-ჯერ შემცირდა მოსახლეობა ცხინვალის რეგიონშიც და ისმის კითხვა, არის კი ეს იმ ხალხის ინტერესში?!“ - განაცხადა მამუკა ბახტაძემ.