გაერთიანებული ოპოზიცია - „ძალა ერთობაშია" - ცესკო-ს თავმჯდომარის თამარ ჟვანიას გადადგომას მოითხოვს. ამის შესახებ დღეს გაერთიანების ერთ-ერთმა წევრმა ლევან ბეჟაშვილმა ისაუბრა. 

მისი თქმით, ცესკო-ს თავმჯდომარემ თამარ ჟვანიამ საარჩევნო ადმინისტრაცია "ქართული ოცნების" საარჩევნო შტაბად გადააქცია. 

ლევან ბეჟაშვილმა პრესკონფერენციაზე წარადგინა ვიდეომასალა. მისი თქმით, ვიდეოში საუბარია იმაზე,თუ როგორ აკომპლექტებს "ქართული ოცნების" საარჩევნო შტაბი საარჩევნო ადმინისტრაციებს, როგორ აწვდის სიებს საოლქო კომისიებს და როგორ ხდება მათთან თანამშრომლობა. 

„ეს არის ნათელი მაგალითი იმისა, რომ პრაქტიკულად, უპრეცედენტო დაბალი რეიტინგის ფონზე საარჩევნო ადმინისტრაცია პირდაპირ უხეშად თანამშრომლობს „ქართული ოცნების" საარჩევნო შტაბთან და მათი დირექტივებით მოქმედებს. ჩანაწერებში საუბარია იმაზე, რომ კრწანისის საოლქო საარჩევნო კომისიის თავმჯდომარე პირდაპირ კონტაქტზეა "ქართული ოცნების" საარჩევნო შტაბის კრწანისის საოლქო კომისიების კურატორ ნინო მაისურაძესთან. ჩანაწერებში ასევე საუბარია, რომ მათ აქტიური თანამშრომლობა აქვთ ალეკო ცხოვრებაძესთან, რომელიც "ქართული ოცნების" შტაბის თბილისის კომისიების კოორდინატორია. ასევე კრწანისის საარჩევნო ოლქის მე-4, მე-10, მე-16 უბნის თავმჯდომარეები პირდაპირ ადასტურებენ იმას, რომ ისინი იქნებიან კომისიის თავმჯდომარეები და მოადგილეები მაშინ, როდესაც საუბნო კომისიის წევრების დანიშვნიდან ერთი თვის შემდეგ თანამდებობის პირების აირჩევენ", - განაცხადა ბეჟაშვილმა. მისივე თქმით, აღნიშნული ჩანაწერები ადასტურებს იმ ფაქტს, რომ უკვე ცნობილია, ვინ იქნებიან საოლქო კომისიის თავმჯდომარეები და მოადგილეები.

„ძალა ერთობაშიას“ საპრეზიდენტო კანდიდატი გრიგოლ ვაშაძეა. გაერთიანებული ოპოზიცია „ძალა ერთობაშია“ ერთიანმა ნაციონალურმა მოძრაობამ და 9 ოპოზიციურმა პარტიამ შექმნა.