ახალგაზრდა იურისტთა ასოციაცია „საზოგადოებრივი მაუწყებლის“ წინააღმდეგ საჯარო ინფორმაციის მოწოდების მოთხოვნით თბილისის საქალაქო სასამართლოს სარჩელით მიმართავს.
უფრო კონკრეტულად კი, სსიპ „საზოგადოებრივი მაუწყებლის“ სამეურვეო საბჭომ 2018 წლის 02 აგვისტოს #425 გადაწყვეტილებით, მაუწყებლის გენერალურ დირექტორს თანხმობა მისცა ტექნიკური გადაიარაღების მიზნით ფინანსური რესურსების მოსაზიდად სესხის აღებასა და შესაბამისი პროცედურების დაწყებაზე. როგორც საჯარო სხდომაზე ითქვა, საქმე ეხება რამდენიმე ათეულ მილიონ ლარს.
საიას ცნობით, სსიპ „საზოგადოებრივი მაუწყებლის“ სამეურვეო საბჭოს გადაწყვეტილებას საფუძვლად დაედო გენერალური დირექტორის 2018 წლის 31 ივლისის #3128/03 სამსახურებრივი ბარათი, რომელშიც მითითებული უნდა იყოს სესხის ზუსტი ოდენობა და ტექნიკური გადაიარაღების დეტალური გეგმა. საიამ გამოითხოვა აღნიშნული დოკუმენტი, თუმცა საზოგადოებრივ მაუწყებელს მოთხოვნილი ინფორმაცია ორგანიზაციისთვის არ მოუწოდებია.
