პარლამენტის პირველი ვიცე-სპიკერის, თამარ ჩუგოშვილის ინფორმაციით, პარტია საპრეზიდენტო კანდიდატთან დაკავშირებით პოზიციას,სავარაუდოდ, კვირას პოლიტსაბჭოზე ჩამოაყალიბებს.
„როგორც იცით, პოზიციები იყო სხვადასხვაგვარი ამ არჩევნებთან დაკავშირებით, ამიტომ პოლტიკური საბჭოს შეხვედრაზე გადავწყვეტთ, რა ფორმით ვერთვებით საარჩევნო კამპანიაში. ჩვენ ვთქვით, რომ, როდესაც ამოიწურება კანდიდატების რეგისტრაციის ვადა და როდესაც ვნახავთ, ვინ არის დარეგისტრირებული, მაშინ მივიღებთ გადაწყვეტილებას. როგორც გვქონდა დაგეგმილი, იმ გეგმას მივყვებით“, - განაცხადა ჩუგოშვილმა ჟურნალისტებთან საუბრისას.
რაც შეეხება „ქართული ოცნების“ მიერ შერჩეული კანდიდატის ფინანსურ მხარდაჭერას, ვიცე-სპიკერის თქმით, პარტია კანონის ფარგლებში იმოქმედებს.
„კანონი რა მასშტაბითაც გვაძლევს და მოგვცემს შესაძლებლობას, რომ მხარი დავუჭიროთ კანდიდატს, რომელიც ჩვენი ნომრით არ მონაწილეობს, მხოლოდ კანონით გათვალისწინებულ ჩარჩოში მივიღებთ მონაწილეობას, გადახვევა არ იქნება“, - განაცხდა ჩუგოშვილმა.
