პარლამენტში მარიხუანასთან დაკავშირებით საკონსტიტუციო სასამართლოს გადაწყვეტილების კანონში ასახვის მიზნით, შინაგან საქმეთა სამინისტროს მიერ მომზადებული კანონპროექტის განხილვას სასულიერი პირები ესწრებოდნენ. 

დეკანოზმა ანდრია ჯაღმაიძემ იურიდიულ კომიტეტს მიმართა ინიციატივით, შეიქმნას  ნებაყოფლობითი რეესტრი, სადაც დარეგისტრირდებიან ადამიანები, რომლებსაც მარიხუანას მოხმარება სურთ. მისი თქმით, რეესტრში დარეგისტრირებული ადამიანებისთვის არ უნდა დადგეს მძიმე  პასუხისმგებლობა, ხოლო მის მიმართ, ვინც რეესტრში არ დარეგისტრირდება და შემოწმების შედეგად აღმოჩნდება, რომ მარიხუანის მომხმარებელია, განსაკუთრებული სასჯელი დაწესდეს. 

„მაქვს კონკრეტული  გამოსავალი თქვენთვის შემოსათავაზებელი, ადამიანს, რომელსაც არ ესმის არც ეკლესიის ხმა, არც კანონის ხმა, არც მორალის ხმა, არაფერი არ ესმის, ხომ არ შეიძლება, რომ არსებობდეს ნებაყოფლობითი რეესტრი და ამ ნებაყოფლობით რეესტრში დარეგისტრირდეს ის, ვისაც პრივატულ სივრცეში უნდა მოწევა. მათ თუ აღმოუჩნდებათ რომელიმე შემოწმების დროს, რომ 20 დღის წინ მოიხმარეს მარიხუანა, არ დადგეს მძიმე პასუხისმგებლობა, თუ დაურეგისტრირებელი ადამიანი მოიხმარს და აღმოჩნდება, რომ დარეგისტრირებული არ არის და ის მოიხმარს, მაშინ მასზე იყოს განსაკუთრებული სასჯელი. თან ამ რეესტრში გაწევრებული ადამიანებისთვის შეიზღუდოს სამოქალაქო პასუხისმგებლობები“, - განაცხადა დეკანოზმა ანდრია ჯაღმაიძემ. 

მარიხუანასთან დაკავშირებით საკონსტიტუციო სასამართლოს გადაწყვეტილების კანონში ასახვის მიზნით, შინაგან საქმეთა სამინისტროს მიერ მომზადებულ კანონპროექტს იურიდიულმა კომიტეტმა პირველი მოსმენით მხარი დაუჭირა.