სამოქალაქო აქტივისტის, გიგა მაქარაშვილის თქმით, ის სასამართლოს დაწესებული ჯარიმის გასაჩივრებას გეგმავს, რადგან თავს დამნაშავედ არ მიიჩნევს.
გიგა მაქარაშვილი სასამართლომ გუშინ ადმინისტრაციულ სამართალდამრღვევად ცნო და 500 ლარით დააჯარიმა.
ის ტელეკომპანია „იბერიის“ ეთერში, სავარაუდოდ, მარიხუანის მოწევას ცდილობდა. ამის გამო გადაცემის ერთ-ერთმა სტუმარმა, დიმიტრი ლორთქიფანიძემ პოლიცია გამოიძახა.
ტელეკომპანიის ეთერში მოწევისთვის შსს მაქარაშვილს მარიხუანის პოპულარიზაციას ედავებოდა.
ამ მუხლის მიხედვით, იკრძალება საქართველოში სპეციალურ კონტროლს დაქვემდებარებულ ნივთიერებათა პოპულარიზაცია ან რეკლამა ან მათი შექმნის, მოხმარების, გამოყენებისა და შეძენის ადგილების შესახებ ინფორმაციის გავრცელება.
მაქარაშვილი ახლა აქციას მართავს და თბილისიდან ენგურის ხიდისკენ ფეხით მიდის. ის მიიჩნევს, რომ არაფერი დაურღვევია და თბილისში დაბრუნების შემდეგ სასამართლოს გადაწყვეტილებას, სავარაუდოდ, გაასაჩივრებს.
„ეს იყო ლეგალური ნივთიერება და მისი თუნდაც პირდაპირ ეთერში გამოჩენა სამართალდარღვევად არ მიმაჩნია. მე არაფერი დამირღვევია და რა თქმა უნდა, ამ გადაწყვეტილებას გავაპროტესტებ“, - უთხრა „ლიბერალს“ გიგა მაქარაშვილმა.
