საქართველოს კომუნიკაციების ეროვნული კომისია ტელევიზიებიდან მოითხოვს, რომ პრეზიდენტობის კანდიდატის, სალომე ზურაბიშვილის საწინააღმდეგო ვიდეორგოლი ამოიღონ სამაუწყებლო ბადიდან.
დოკუმენტში აღნიშნულია, რომ ვიდეორგოლები ეწინააღმდეგება „მაუწყებლის შესახებ“ კანონს.
კომისია განმარტავს, თუ რატომ ეწინააღმდეგება ვიდეორგოლები კანონს. კერძოდ, იმ ვიდეორგოლებიდან, რომლებიც მიზნად ისახავს სალომე ზურაბიშვილის არჩევისთვის ხელის შეშლას, ერთ-ერთში გამოყენებულია ნაწყვეტი გადაცემა „რეაქციიდან“. კომისიის განმარტებით, „მაუწყებლობის შესახებ" კანონის თანახმად, იკრძალება ახალი ამბების, საზოგადოებრივ-პოლიტიკური და წინასაარჩევნო პოლიტიკური პროგრამის წამყვანის, ჟურნალისტის ნებისმიერი სახით მონაწილეობა რეკლამაში ან ტელეშოპინგში.
ასევე, ნათქვამია, რომ ერთ-ერთ ვიდეორგოლში სალომე ზურაბიშვილის მიმართ გამოყენებულია შეურაცხმყოფელი გამონათქვამები, მოხსენიებულია ის, როგორც მოღალატე. კომისია აღნიშნავს, რომ ის არღვევს ზნეობროვ ნორმებს და ბღალავს ფიზიკურ პირს, რაც ეწინააღმდეგება „მაუწყებლის შესახებ“ კანონს.
კომუნიკაციის კომისიის დოკუმენტში აღნიშნულია, რომ ზურაბიშვილის საწინააღმდეგო ვიდეორგოლი შეიცავს უხამსი შინაარსის გამონათქვამებს, რაც ასევე ეწინააღმდეგება კანონს.
დოკუმენტი „რუსთავი 2-ის“ იურისტმა, თამთა მურადაშვილმა გამოაქვეყნა.
