სამსახურებრივი მდგომარეობის გამოყენებით, საბრძოლო მასალის მართლსაწინააღმდეგო შეძენის, შენახვისა და გასაღების ფაქტზე ბრალდებულის სახით სამი პირია დაკავებული, - ამის შესახებ სამხედრო პოლიციის დეპარტამენტის გამოძიების სამსახურის უფროსის მოადგილემ, ირაკლი ბაზერაშვილმა დღევანდელ ბრიფინგზე განაცხადა. დაკავებულებს შორის ორი თავდაცვის სამინისტროს თანამშრომელია.
„გამოძიებით დადგინდა, რომ ლოჯისტიკური უზრუნველყოფის სარდლობის, შეიარაღებისა და ტექნიკის სარემონტო ბაზის, შენახვის განყოფილების საბრძოლო მასალის შენახვის სპეციალისტი, გ.გ. დანაშაულებრივ კავშირში იმყოფებოდა ლოგისტიკური უზრუნველყოფის სარდლობის საავტომობილო ბაზის საშტატო ასეულის მეთაურის მოადგილე ზ.მ-სთან, რომლებიც მოქალაქე ს.ბ.-ს დახმარებით, შეიარაღების და ტექნიკის სარემონტო ბაზიდან მართლსაწინააღმდეგოდ დაუფლებული საბრძოლო მასალის კონკრეტულად, საბრძოლო ვაზნების რეალიზაციას ახდენდნენ. საქმეზე ჩატარებული საგამოძიებო მოქმედებების შედეგად, ბრალდებულების სათავსოდან და ავტომანქანიდან ამოღებულია დიდი რაოდენობით საბრძოლო ვაზნები“, - განაცხადა ირაკლი ბაზერაშვილმა.
მისი ინფორმაციით, ბრალდებულებს აღკვეთის ღონისძიების სახით შეეფარდათ პატიმრობა. ბრალის დამტკიცების შემთხვევაში კი მათ 9-დან 13 წლამდე თავისუფლების აღკვეთა ემუქრებათ.
