საქართველოს თავდაცვისა და უშიშროების კომიტეტის თავმჯდომარის ირაკლი სესიაშვილის მომზადებული კანონპროექტით, რუკაზე საქართველოს ტერიტორიული მთლიანობის დარღვევით გამოსახვა სისხლის სამართლის დანაშაული გახდება.
როგორც „ლიბერალს“ პარლამენტის დეპუტატმა უთხრა, კანონპროექტი ჯარიმას ან 2 წლამდე ვადით თავისუფლების აღკვეთას ითვალისწინებს.
„საქართველოს ტერიტორიული მთლიანობის დარღვევით შედგენილი რუკის დამზადება, დაბეჭდვა, გავრცელება, რეკლამირება, სხვა საგანზე განთვსება, იმპორტი, ექსპორტი იქნება სისხლისსამართლებრივად დასჯადი თუკი პარლამენტი მხარს დაუჭერს. სასჯელად განვსაზღვრე ჯარიმა ან 2 წლამდე ვადით თავისუფლების აღკვეთა, როგორც ეს არის მაგალითად დროშის შეურაცხყოფისთვის განსაზღვრული“, - განუცხადა „ლიბერალს“ ირაკლი სესიაშვილმა.
კანონპროექტი რუსულ პროპაგანდასთან ბრძოლისთვის იქმნება, რადგან ირაკლი სესიაშვილის თქმით, რუსეთის სტრატეგიის ერთი ნაწილია სწორედ რუკების დამახინჯება.
სესიაშვილის თქმით, კანონპროექტთან დაკავშირებით ის დამატებით კონსულტაციებს გადის და დაახლოებით ერთ კვირაში მას უკვე პარლამენტში დაარეგისტრირებს.
