თუ არც ერთი კანდიდატი არ მოგწონთ, მაგრამ გსურთ, რომ თქვენი ხმა არ დაიკარგოს - „არჩევნებზე მივალ და ყველას გადავხაზავ“ გამოსავალი არ არის. ამით მხოლოდ ბათილი ბიულეტენების რაოდენობის გაზრდას შეუწყობთ ხელს.

როგორც ცესკოს პრესსპიკერმა ანა მიქელაძემ „ლიბერალს“ განუმარტა, კანდიდატების მიერ მიღებული ხმები გამოითვლება არა არჩევნებზე მისული ამომრჩევლების რაოდენობიდან, არამედ ნამდვილი ხმების რაოდენობიდან. ნამდვილ ხმებში არ შედის ბათილი ბიულეტენები [მათ შორის, ის ბიულეტენები, რომელშიც ყველა კანდიდატი გადახაზულია].

საქართველოს საარჩევნო კოდექსის 69-ე მუხლში დეტალურად არის განსაზღვრული, როდის არის ბიულეტენი ბათილი, მათ შორის არის ასეთი ჩანაწერი: „შეუძლებელია იმის დადგენა, რომელ საარჩევნო სუბიექტს მისცა ხმა ამომრჩეველმა“.

ანა მიქელაძის თქმით, თუ ბიულეტენში ყველა კანდიდატი იქნება გადახაზული, შეუძლებელი იქნება იმის დადგენა, ვის მისცა ხმა ამომრჩეველმა და, შესაბამისად, ბიულეტენი იქნება ბათილი.

საარჩევნო კანონმდებლობის მიხედვით, არჩევნების შედეგების შეჯამებისას, შემაჯამებელ ოქმში აღინიშნება: არჩევნებში მონაწილე ამომრჩეველთა რაოდენობა; ბათილად მიჩნეულ ბიულეტენთა რაოდენობა; თითოეული საარჩევნო სუბიექტისთვის მიცემული ხმების რაოდენობა და არჩეული პირის ან პირების ვინაობა.

საარჩევნო კოდექსის 104-ე მუხლის (არჩევნების შედეგების შეჯამება) თანახმად,

არჩეულად მიიჩნევა საქართველოს პრეზიდენტობის ის კანდიდატი, რომელსაც ხმა მისცა არჩევნებში მონაწილეთა ნახევარზე მეტმა. არჩევნებში მონაწილეთა ხმების რაოდენობაში არ ჩაითვლება ბათილად ცნობილი ბიულეტენებით გათვალისწინებული ხმების რაოდენობა.

28 ოქტომბრის საპრეზიდენტო არჩევნებში 25 კანდიდატი მონაწილეობს.