დღეს საია ზურაბ ჯაფარიძის სახელით საკონსტიტუციო სასამართლოს მიმართავს და ადმინისტრაციულ სამართალდარღვევათა კოდექსის 8 მუხლის ნორმატიული შინაარსის არაკონსტიტუციურად ცნობას მოითხოვს. კერძოდ:
- 32-ე - ადმინისტრაციული პატიმრობა;
- 33-ე - ადმინისტრაციული სამართალდარღვევისათვის სახდელის დადების ზოგადი წესი;
- 233-ე - ადმინისტრაციული სამართალდარღვევის საქმის განხილვა მოქალაქეთა თანასწორობის საწყისებზე;
- 236-ე - მტკიცებულებანი;
- 237-ე - მტკიცებულებათა შეფასება;
- 240-ე - ადმინისტრაციული სამართალდარღვევის ოქმის შინაარსი;
- 264-ე - ადმინისტრაციულ სამართალდარღვევათა საქმეების განხილვისას გამოსაკვლევი გარემოებანი;
- 266-ე - ადმინისტრაციული სამართალდარღვევის საქმეზე მიღებული დადგენილება;
„მაგალითად, წვრილმანი ხულიგნობა, რომელიც არის ერთ-ერთი სამართლადარღვევა ადმინისტრაციულ სამართალდარღვევათა კოდექსში, არის სისხლისსამართლებრივი ბუნების, როგორც ნორმის შინაარსიდან გამომდინარე, ასევე იმის გამოც, რომ ითვალისწინებს 15-დღიან პატიმრობას. სტანდარტი არის ის, რომ ამგვარ სამართალდარღვევებზე უნდა გავრცელდეს ისეთი საპროცესო გარანტიები, როგორიც არის სისხლის სამართლის მართმსაჯულებაში, ვინაიდან როგორც საკონსტიტუციო სასამართლოც მიიიჩნევს, როდესაც პასუხისმგებლობის დამკისრებელ ნორმასთან გვაქვს საქმე, აუცილებელად, უაღრესად დიდი მნიშვნელობა ენიჭება იმას, რომ სამართლიანი სასამართლოს უფლებით მოხდეს სრულყოფილი სარგებლობა“, - ამბობს „ლიბერალთან“ საუბრისას საიას იურისტი ეკა მამრიკიშვილი.
მისი თქმით, ადმინისტრაციულ სამართალდარვევათა კოდექსი ახლა იმდენად პრობლემურია, რომ უგულებელყოფილია საპროცესო გარანტიები - მტკიცების ტვირთის სწორად გადანაწილება, უტყუარი მტკიცებულებები და ა.შ.
„სამართლადამცავი ორგანოს წარმომადგენელმა სასამართლოზე არ უნდა წარმოადგინოს მხოლოდ ოქმი, მას უნდა დაერთოს ისეთი ნეიტრალური მტკიცებულება, რომელიც დაადასტურებს, რომ პირმა ნამდვილად ჩაიდინა სამართლადარღვევა. პრაქტიკაში დამახინჯებულად ხდება ამგვარი ნორმების გამოყენება, მაგალითად, აქციებზე წვრილმანი ხულიგნობისა და პოლიციისადმი დამორჩილებლობის მუხლით ყოველთვის აკავებენ პირებს და შემდეგ მათ აუცილებლად ცნობენ სამართლდამრღვევად. ამან უკვე მასობრივი სახე მიიღო. ასევე, არანაირი ბერკეტი არ არსებობს იმისა, რომ დღეს არსებული კოდექსით სასამართლო დაავალდებულო, მსგავსი სამართლაწარმოება არ განავითაროს“, - ამბობს ეკა მამრიკიშვილი.
