საქართველოს შინაგან საქმეთა სამინისტროს აშშ-ის მთავრობამ „აილენდის“  კლასის ორი სადარაჯო ხომალდი გადასცა. ხომალდების გადმოცემის  ცერემონია  ფოთში, სანაპირო დაცვის ბაზაზე გაიმართა.

შინაგან საქმეთა მინისტრმა, გიორგი გახარიამ, აღნიშნულ ფაქტს ახალი შესაძლებლობის ფანჯარა უწოდა NATO-სთან ურთიერთობაში. მისი თქმით, ამ ორ გემს აქვს პრაქტიკულად დიდი მნიშვნელობა ქვეყნისთვის. 

 „ამ ორი გემის საშუალებით, ჩვენ შეგვიძლია  მონაწილეობა მივიღოთ NATO-ს წვრთნებში და შინაგან საქმეთა სამინისტროს, როგორც  უკვე ახალ ორგანოს, ახალ სამინისტროს აქვს საშუალება, გახსნას ახალი  შესაძლებლობების ფანჯარა NATO-სთან ურთიერთობაში, რამეთუ ჩვენი  კოოპერირება იყოს უფრო ღრმა და საქართველო უფრო ახლოს იყოს NATO-სთან.  აქედან გამომდინარე, ამ ორი გემის დღეს გაშვებას, რომელსაც მინდა ზურგის ქარი ვუსურვო, აქვს პრაქტიკულად დიდი მნიშვნელობა ქვეყნისთვის, შინაგან საქმეთა სამინისტროსა და NATO-სთან ურთიერთობისთვის. ასევე,  სიმბოლურია გემების სახელწოდებები („ოჩამჩირე“ და „დიოსკურია“) და, რა თქმა უნდა, მე დღეს ვუსურვე და  კიდევ ერთხელ გავიმეორებ, ამ პირად შემადგენლობას, რომლებიც მსახურობენ ამ  გემებზე, მინდა ვუსურვო პირდაპირი მონაწილეობა ქვეყნის ერთიანობის 
საქმეში“, - განაცხადა გახარიამ.