პრემიერ-მინისტრის, მამუკა ბახტაძის განცხადებით, მთავრობა აქტიურად თანამშრომლობს სამოქალაქო საზოგადოებასთან, რათა მიიღონ კონკრეტული რეკომენდაციები იმ რეფორმებზე, რომელიც უნდა დაინერგოს, მაგრამ საპასუხოდ სამოქალაქო საზოგადოებისგან ისმის პოლიტიკურად ანგაჟრებული განცხადებები.
„იცით, თუ როგორ აქტიურად თანამშრომლობს ჩვენი გუნდი სამოქალაქო საზოგადოებასთან და მინდა კონკრეტული არგუმენტი მოგიყვანოთ. ჩვენ გადავედით იმ ეტაპზე, რომ გვაქვს ახალი ტალღა რეფორმების და თქვენ როგორ ფიქრობთ, ჩვენ არ ვართ დაინტერესებული იმით, რომ მივიღოთ კონკრეტული რეკომენდაციები ამა თუ იმ რეფორმაზე, როგორ უნდა დავნერგოთ ის იმდაგვარად, რომელიც საუკეთესოდ უპასუხებს საზოგადოების ინტერესებს? მაგრამ ამის საპასუხოდ რას ვხედავთ? ამის საპასუხოდ ხშირ შემთხვევაში გვესმის პოლიტიკურად ანგაჟირებული განცხადებები“, - თქვა მამუკა ბახტაძემ.
მისივე თქმით, სამოქალაქო საზოგადოების ჩართულობა დემოკრატიული ინსტიტუტების მშენებლობაში არის მნიშვნელოვანი, მაგრამ ეს კომუნიკაცია გადადის იმგვარ განცხადებებში, რისი მოსმენაც არ არის კარგი.
„როცა ასეთი კომუნიკაცია გადადის ხშირ შემთხვევაში ანგაჟირებულ განცხადებებში, ამის მოსმენა ნამდვილად არ არის კარგი და არ არის კარგი საქართველოში დემოკრატიული ინსტიტუტების კიდევ უფრო განმტკიცების საქმეში“, - განაცხადა ბახტაძემ.