პროკურატურამ სამოქალაქო აქტივისტი გიგა მაქარაშვილის თავზე ნაგვის ურნის ჩამომხობის ფაქტზე დაზარალებულად არ ცნო. ინფორმაცია "ლიბერალს" დაუდასტურა მაქარაშვილის ადვოკატმა. მისი თქმით, დღეს მათ 22 ოქტომბრით დათარიღებული წერილი მიიღეს, სადაც წერია, რომ პროკურატურა საქმის გადაკვალიფიცირებაზე და დაზარალებულად ცნობაზე უარს ეუბნება გიგა მაქარაშვილს.

აღნიშნულზე პოსტი სოციალურ ქსელში გიგა მაქარაშვილმაც გამოაქვეყნა. 

გორის მერიის თანამშრომელმა სამოქალაქო აქტივისტ გიგა მაქარაშვილს, რომელმაც სხვა აქტივისტებთან ერთად გორის მერიასთან საპროტესტო აქცია გამართა, თავზე ნაგვის ურნა ჩამოამხო. შემთხვევის ამსახველი კადრები ტელეკომპანია „დიამ,“ გაავრცელა. პირი, რომელმაც მაქარაშვილს ურნა თავზე დაამხო, თემურ მანველიშვილია, გორის მერიის ადმინისტრაციის უფროსი. 

გორის მერიის თანამშრომლის მიერ მაქარაშვილისთვის თავზე ნაგვის ურნის ჩამომხობის ფაქტზე გამოძიება გამოძიება მიმდინარეობს სისხლის სამართლის კოდექსის 126-ე (1) მუხლით  (ცემა ან სხვაგვარი ძალადობა, რამაც დაზარალებულის ფიზიკური ტკივილი გამოიწვია).

მაქარაშვილის ინტერესების დამცველი კი მოითხოვს, რომ  შინაგან საქმეთა სამინისტრომ საქმე გადააკვალიფიციროს და გამოძიება წარმართოს სისხლის სამართლის კოდექსის 144 ტერცია მუხლის მე-2 (ა) პუნქტის მიხედვით (დამამცირებელი მოპყრობა, ჩადენილი მოხელის მიერ) და 161-ე მუხლის პირველი ნაწილით (შეკრების უფლების განხორციელებისათვის უკანონოდ ხელის შეშლა ძალადობით).