"მივიღე გადაწყვეტილება, რომელიც არის ნაკარნახევი პასუხისმგებლობის გრძნობით საქართველოს მომავლის წინაშე. ძალიან მნიშვნელოვანი არჩევნებია და მნიშვნელოვანია რა არჩევანს გააკეთებს საქართველოს მოსახლეობა", - განაცხადა ყოფილმა პრემიერ-მინისტრმა გიორგი კვირიკაშვილმა ხმის მიცემის შემდეგ. 

ჟურნალისტის კითხვის მიუხედავად, კვირიკაშვილმა არ დააკონკრეტა, თუ ვის აძლევდა ხმას არჩევნებზე.

„პოლიტიკაში არ ვაპირებ დაბრუნებას. მაქვს ძალიან საინტერესო საქმე. კარგად ბრძანდებოდეთ, წარმატებებს გისურვებთ ყველას“, - მიმართა ჟურნალისტებს კვირიკაშვილმა.

------------------

დღეს საქართველოში საპრეზიდენტო არჩევნები იმართება. სულ რეგისტრირებულია 25 კანდიდატი. ეს არის ბოლო არჩევნები, როდესაც საქართველოს მოქალაქეები პრეზიდენტს პირდაპირი წესით აირჩევენ. ახალი კონსტიტუციის შესაბამისად შემდეგ პრეზიდენტს პარლამენტი აირჩევს.

საპრეზიდენტო არჩევნებს დააკვირდება საარჩევნო სუბიექტების 82 904 წარმომადგენელი, 73 ადგილობრივი სადამკვირვებლო ორგანიზაციის 22 032 დამკვირვებელი და 58 საერთაშორისო ორგანიზაციის 1163 საერთაშორისო დამკვირვებელი. საარჩევნო პროცესს გააშუქებს 125 მედიაორგანიზაციის 1 957 ჟურნალისტი. აკრედიტებულ მედიასაშუალებებს შორის 31 საერთაშორისო და 94 ადგილობრივი მედია ორგანიზაციაა.