„საერთაშორისო გამჭვირვალობა - საქართველოს" აღმასრულებელი დირექტორი ეკა გიგაური თბილისის მთავარ სამმართველოში გამოკითხვაზე მივიდა.
გიგაურის განცხადებით, მას 13 ოქტომბერს დაემუქრნენ, ამიტომ პროკურატურას მიმართა და გამოძიების დაწყება მოითხოვა.
„თავდასხმები სულ მიმდინარეობს პირადად ჩემზე და არასამთავრობო ორგანიზაციის სხვა წარმომადგენლებზე, მაგრამ ეს იყო ერთი მუქარა, კონკრეტული პირის „პროფაილი". გადავედი და მოქმედი გვერდი იყო. თუ არ არის მოქმედი გვერდი და „ფეიკია", მაშინ ვიღაცის დავალებულია, მაგრამ მე რაც ვნახე, მოქმედია", - განაცხადა გიგაურმა.
„საერთაშორისო გამჭვირვალობის“ განცხადებით, მუქარის შემცველი და ასევე შეურაცხმყოფელი პერსონალური შეტყობინებები სოციალური ქსელის მეშვეობით განსაკუთრებით მას შემდეგ გააქტიურდა, რაც ხელისუფლების მაღალი თანამდებობის პირებმა, მათ შორის პარლამენტის თავმჯდომარემ და ასევე რიგითმა დეპუტატებმა ბოლო კვირებში შეტევა წამოიწყეს სამოქალაქო სექტორის წინააღმდეგ.
„ნიშანდობლივია, რომ მუქარის ავტორი ზუსტად იმავე ფრაზეოლოგიას იყენებს, რაც პარლამენტის თავმჯდომარემ გამოიყენა არასამთავრობო ორგანიზაციების წინააღმდეგ, როცა ისინი „ფაშიზმის თანამონაწილეებად“ მოიხსენია“, - აცხადებდა ორგანიზაცია.
ფოტო: IPN
