დღეს, თბილისის მთავრობის სხდომაზე მერმა, კახა კალაძემ განაცხადა, რომ იპოდრომის მიმდებარედ ე.წ. ჩოგბურთის კორტების ტერიტორია მუნიციპალიტეტს დაუბრუნდება და მომავალი წლის ბიუჯეტში მის რეაბილიტაციასაც გაითვალისწინებენ.
„მინდა, „ნაციონალური მოძრაობის“ რეჟიმის დანაშაულებრივი ურბანული პოლიტიკის ერთ-ერთ მორიგ მსხვერპლზე გიამბოთ. ეს არის მიწის ნაკვეთი იპოდრომის მიმდებარე ტერიტორიაზე, კონკრეტულად, საბურთალოსა და ბახტრიონის ქუჩებს შორის ე.წ. ჩოგბურთის კორტების ტერიტორია. ეს საკითხი ძალიან მტკივნეულია ადგილობრივი მოსახლეობისთვის, ძალიან ბევრი წერილი შემოვიდა ამასთან დაკავშირებით და მგონია, რომ ადგილობრივი მოსახლეობისთვის, ზოგადად, ეს ადგილი ყოველთვის იყო სპორტულ-გამაჯანსაღებელი ცენტრი, სადაც ძალიან ბევრი თბილისელი დადიოდა...
ამ კონკრეტულ თემაზე სიახლე არის ის, რომ ეს მიწა, რომელსაც რთულია, დღეს კორტები უწოდო, რადგან ძალიან მძიმე მდგომარეობაშია, დაუბრუნდება მუნიციპალიტეტს და აქვე მინდა დაგავალოთ, რომ მომავალი წლისთვის დამუშავდეს პროექტი და პატარა სპორტული კომპლექსი გავაკეთოთ და მგონია, რომ ეს იქნება ძალიან მნიშვნელოვანი როგორც ადგილობრივი მოსახლეობის, ისე დედაქალაქის მცხოვრებლებისთვის“, - განაცხადა კახა კალაძემ.
„მერიამ იპოდრომის კორტები აქციოს უბნის სპორტულ ცენტრად - საფეხბურთო სტადიონად“,- ადგილობრივმა მოსახლეობამ ტერიტორიის სპორტულ ცენტრად გადაქცევის მოთხოვნით სოციალურ ქსელში გვერდი რამდენიმე თვის წინ შექმნა.
