„ევროპული საქართველოს“ ერთ-ერთმა ლიდერმა გიგა ბოკერიამ ჟურნალისტებთან საუბარში აღნიშნა, რომ აუცილებელია, იუსტიციისა და საგარეო საქმეთა მინისტრები პარლამენტში მივიდნენ და ჰააგაში მიმდინარე პროცესებზე არსებულ კითხვებს პასუხი გასცენ.
„იმ ანატომიაში გარკვევა არ მჭირდება, სად არის ზღვარი ღალატს, სიძულვილსა და სასარგებლო იდიოტიზმს შორის, რადგან შედეგი დამანგრეველია და მინისტრებს უნდა მოვუსმინოთ, რათა საზოგადოებას ეჭვები გაუფანტონ, თუ ეს შეუძლიათ. „ქართულ ოცნებაში“ დიდი კონკურენციაა იმის თაობაზე, ვისი პოლიტიკური ბრალი უფრო დიდია იმ ზიანში, რომელიც საქართველოს ბევრი მიმართულებით მიადგა. ჰააგის მეორე სასამართლოში რაც მოხდა, უკვე შემდგარი ზიანია, როცა მათ დევნილების დაბრუნების საკითხზე დავა არ გააგრძელეს. ეს უკვე მომხდარი ამბავია. საზოგადოებას არათუ ლეგიტიმური საფუძველი აქვს, ზელეგიტიმური საფუძველი აქვს იმისა, რომ ეჭვები და შიში ჰქონდეს იმის თაობაზე, როგორ იქცევა ეს მთავრობა, რომლის პოლიტიკური პოზიციები საკითხზე ცნობილია, რადგან მათი საპრეზიდენტო კანდიდატის განცხადებები საქართველოს ინტერესებისთვის დამანგრეველია. მინისტრების დაბარების მოთხოვნას ისტერიკით და ცხრა წელზე საუბრით ხვდებიან”, – განაცხადა ბოკერიამ.
