სახალხო დამცველი ნინო ლომჯარია შსს-ში გამოკითხვაზე დაიბარეს - ამის შესახებ „ლიბერალს“ შსს-ში განუცხადეს.

უწყების პრესსამსახურის ცნობით, ომბუდსმენი შსს-ში დაბარებულია მის მიერ Facebook-ზე გავრცელებულ განცხადებასთან დაკავშირებით.

„მასთან გასაუბრების შემდეგ მიიღება გადაწყვეტილება გამოძიების დაწყებასთან დაკავშირებით“, - აცხადებენ შსს-ში. 

დღეს ნინო ლომჯარიამ Facebook-ზე კომენტარების „სქრინშოტები“ გაავრცელა, რომელზეც მისი თქმით, სახალხო დამცველად არჩევის შემდეგ მუქარის შემცველ კომენტარებსა და შეტყობინებებს იღებდა.

„მემუქრებოდნენ შუბლის გახვრეტით, სნაიპერის ტყვიით, მიხსენიებდნენ უცენზურო სიტყვებით და ა.შ... უკვე ბევრისგან მსმენია იგივე, განსაკუთრებული სამიზნე სამოქალაქო აქტივისტები და პოლიტიკური პარტიების მხარდამჭერები, კანდიდატები არიან... სამწუხაროდ, უკვე ჩვეულებრივი პრაქტიკა გახდა მუქარა და შეურაცხყოფა, დაუსრულებელი შეტყობინენები, სადაც გაურკვეველი პირები სიცოცხლის მოსპობით იმუქრებიან“, - აცხადებს ლომჯარია.

ლომჯარიას განცხადებით, საკითხის მასშტაბურობიდან და სიმწვავიდან გამომდინარე, ყველამ უნდა ისაუბროს ამ თემაზე. ის სამართალდამცავებს მოვუწოდოთ მთელი სერიოზულობით მოეკიდონ მსგავსი ფაქტების გამოძიებას.

სალომე ზურაბიშვილმა დღეს გამართულ საგანგებო ბრიფინგზე განაცხადა, რომ მას და მის შვილებს სიცოცხლის ხელყოფით ემუქრებიან. მისი თქმით, მუქარის ავტორები იდენტიფიცირებულები არიან. ისინი არიან სამხედრო პირები, რომლებიც დაკავშირებულები არიან „ერთიან ნაციონალურ მოძრაობასთან.“

მისი თქმით, მან უკვე მიმართა შს სამინისტროს, რომ დაუყოვნებლიდ მოახდინონ რეაგირება.

„ბოლო დღეებში კერძოდ 9, 10 და 11 ნოემბერს ჩემმა შვილებმა, თეიმურაზმა და ქეთევანმა, ასევე, მე მივიღეთ სმს და ხმოვანი შეტყობინებები, რომლებშიც გამოთქმულია სიცოცხლის ხელყოფის მუქარა - შუბლს გაგიხვრეტ, თქვენ სისხლს დავლევ. მუქარა რეალურია ავტორები ინდენტიფიცირებულები არიან - ყოფილი სამხედროები დაკავშირებულები ენმ-თან და მათ მეთაურებთან“, - განაცხადა ზურაბიშვილმა