საქართველოს ცენტრალურმა საარჩევნო კომისიამ დღევანდელ სხდომაზე 28 ოქტომბრის საპრეზიდენტო არჩევნების პირველი ტურის შედეგები შეაჯამა.
ცესკოს სხდომაზე საპრეზიდენტო არჩევნების მეორე ტურის თარიღზეც იმსჯელეს და ხმათა უმრავლესობით დაუჭირეს მხარი გადაწყვეტილებას, რომ საპრეზიდენტო არჩევნების II ტური 28 ნოემბერს გაიმართოს..
„28 ნოემბერი იქნება უქმე დღე საქართველოს მთელ ტერიტორიაზე" - თქვა თამარ ჟვანიამ.
კომისიამ ასევე მიიღო გადაწყვეტილება, რომ უცხოეთში საარჩევნო უბნებზე ხმის მიცემის ვადა ადგილობრივი დროით 24:00 საათამდე გახანგრძლივდეს.
საპრეზიდენტო არჩევნების მეორე ტურში მმართველი პარტიის „ქართული ოცნების“ მიერ მხარდაჭერილი დამოუკიდებელი კანდიდატი სალომე ზურაბიშვილი და გაერთიანებული ოპოზიციის „ძალა ერთობაშია“ კანდიდატი გრიგოლ ვაშაძე მონაწილეობენ.
საპრეზიდენტო არჩევნების პირველ ტურში სალომე ზურაბიშვილმა ხმების 38.64%, ხოლო გრიგოლ ვაშაძემ ხმების 37.74% მიიღო.
ცენტრალური საარჩევნო კომისიის ინფორმაციით, არჩევნებში სულ 1 647 878-მა ამომრჩეველმა მიიღო მონაწილეობა, რაც ამომრჩეველთა საერთო რაოდენობის 46.74%-ია.