საგანგებო სიტუაციების მართვის სამსახურის ინფორმაციით, მაშველებმა ჟინვალის წყალსაცავიდან ორი დღის წინ გადავარდნილი ბეტონმზიდის მძღოლის ცხედარი ამოასვენეს. გარდაცვლილი 53 წლის იყო.
„სამძებრო სამუშაოების შედეგად მოკვლეულ იქნა ცხედრის ადგილმდებარეობა, თუმცა განსაკუთრებულად რთული პირობების გამო საჭირო გახდა წყლის ქვეშ დამატებითი სამუშაოების ჩატარება“,- განმარტავენ საგანგებო სიტუაციების მართვის სამსახურში.
შსს: ჟინვალში ჩავარდნილი მუშა მაშველებმა იპოვეს და ამ წუთებში მის ამოყვანას ცდილობენ
უწყების ინფორმაციით, ღონისძიებაში ჩართული იყო საგანგებო სიტუაციების მართვის სამსახურის 16 მაშველი და 3 მყვინთავი.
დუშეთის რაიონში შემთხვევა 14 ნოემბერს, საღამოს საათებში მოხდა. სამუშაოების შესრულებისას ავტოსაგზაო შემთხვევის შედეგად გზიდან გადავიდა და ჟინვალჰესის წყალსაცავში ჩავარდა ბეტონმზიდი. მომხდარზე შსს-მ გამოძიება დაიწყო.
„გამოძიების პირველადი ინფორმაციით ჟინვალი-თვალივის საავტომობილო გზაზე სამუშაოებს ერთ-ერთი კერძო კომპანია ასრულებს, სადაც დასაქმებული იყო სპეციალური სატრანსპორტო საშუალების მძღოლი ი.ჟ.
მომხდარ ფაქტთან დაკავშირებით გამოძიება სისხლის სამართლის კოდექსის 276 მუხლით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს“, - წერია შსს-ს განცხადებაში.