მთავარი პროკურორის ყოფილი მოადგილე ლაშა ნაცვლიშვილი მანქანას არაფხიზელ მდგომარეობაში მართავდა. ამის ამსახველი კადრები „რუსთავი 2-მა“ გაავრცელა. 

ტელეკომანიის ცნობით, ვიდეო 2017 წლის ივლისშია ჩაწერილი.

ანონიმური წყარო „რუსთავი 2-თან“ ამბობს, რომ პოლიცია დიდი ხნის განმავლობაში ცდილობდა ლაშა ნაცვლიშვილის გაჩერებას, რომელმაც საავარიო სიტუაცია რამდენჯერმე შექმნა. საპატრულო პოლიციის ეკიპაჟმა მძღოლს გაჩერებისკენ მოუწოდა, მაგრამ დაუმორჩილებლობის შემდეგ პატრული იძულებული გახდა ნაცვლიშვილს დადევნებოდა. 

„გადაჭარბებული სიჩქარე, საპატრულო პოლიციის ეკიპაჟის დაუმორჩილებლობა, ავარიული ვითარების შექმნა, მანევრირების წესების დარღვევა, ალკოტესტზე შემოწმების თავის არიდება და ბოლოს გაშვება", - ამბობს „რუსთავის 2-ის“ წყარო. 

სიუჟეტი ეთერში გასვლის შემდეგ ლაშა ნაცვლიშვილმა საკუთარ Facebook-გვერდზე დაადასტურა, რომ მანქანას არაფხიზელი მართავდა და კანონი დაარღვია. ის ბოდიშს უხდის ოჯახს და მაყურებელს:

1. "ფაქტია, რომ საჭესთან ზომაზე მეტად ნასვამი ვიჯექი, კანონი დავარღვიე და ამის გამო გულწრფელად ბოდიში მინდა მოვუხადო ყველას, ვინც კადრები იხილა. პირველ რიგში, ჩემს ოჯახს - ნამდვილად არ იყო სასიამოვნო საყურებელი.
2. წინააღმდეგობა პოლიციისთვის არ გამიწევია, ღმერთმა დამიფაროს, ასეთი რამ არასდროს მიკადრია, არააა ეს ჩემთვის ჩვეული! უფრო მეტიც, საპატრულო პოლიციის თანამშრომელმა შინ მიმაცილა და ყველაფერი მშვიდობით დასრულდა.
3. გვარამიას და მის უფროსს, სააკაშვილს მინდა მივმართო: ყველასთვის ცნობილია, რომ ორივე დიპლომირებული, მოქმედი და კარიერული ნარკომანი ხართ. ძალიან კი ცდილობთ თქვენს რიგში დამაყენოთ, მაგრამ არ გამოგდით. ქართული სუფრისადმი ჩემი სიყვარულის მოდელირება ძნელიც არის და შეუძლებელიც", - წერს ნაცვლიშვილი.