„სვეტის” დირექტორ გივი ჯიბლაძესთან 6 ოქტომბერს გამოქვეყნებული ინტერვიუს შემდეგ, რომელშიც ის საუბრობს სუს-ის უფროსის მოადგილისა და მერის ყოფილი მოადგილის - გრიგოლ ლილუაშვილის, ასევე თბილისის ყოფილი მერის დავით ნარმანიას შესაძლო კორუფციულ გარიგებებზე, გამოძიება ამ დრომდე არ დაწყებულა
გივი ჯიბლაძემ კორუფციის შესახებ „კურიერის“ ეთერში დაკავებდამდე ცოტა ხნით ადრე ისაუბრა.
„ლიბერალი“ ფინანსთა სამინისტროს საგამოძიებო სამსახურმა და სუს-მა პროკურატურაში გადაამისამართა.
პროკურატურის პრესსამსახურში კი აცხადებენ, რომ გამოძიება აღნიშნულზე არ დაწყებულა, რადგან გივი ჯიბლაძე დუმილის უფლებას იყენებს.
ჯიბლაძემ დუმილის უფლების გამოყენებამდე შესაძლო კორუფიული გარიგების შესახებ საჯაროდ, ინტერვიუში ისაუბრა - ამაზე პროკურატურაში აცხადებენ, რომ ეს არ აღმოჩნდა საკმარისი საფუძველი გამოძიების დასაწყებად.
ჯიბლაძე ინტერვიუში ამბობდა, რომ თბილისის მერის ყოფილი მოადგილე გრიგოლ ლილუაშვილი წილის სანაცვლოდ კომპანია „სვეტს“ სამშენებლო ნებართვებით უზრუნველყოფდა და „მისი ვალდებულება ნებართვების გაკეთება იყო“.
გივი ჯიბლაძის თქმით, გრიგოლ ლილუაშვილის ნათესავი ლაშა ჭელიძე „სვეტში“ ფიქტიურად 20%-ს ფლობდა, „რუსთავი 2-ის“ ინფორმაციით, ჭელიძე კომპანიასა და ლილუაშვილს შორის მხოლოდ შუამავალი იყო.
ჯიბლაძე დავით ნარმანიას ინტერესებზეც საუბრობს და აცხადებს, რომ ყოფილი მერი „სვეტისგან“ 800 მ.კვ მიწის ფართობის ამხანაგობისთვის გადაცემას მოითხოვდა, რომლის წევრიც ნარმანიას ნათესავი იყო.
„სვეტის“ დირექტორი ინტერვიუში ამბობს, რომ კახა კალაძის მერად არჩევის შემდეგ, იცოდა, რომ კალაძეს ექნებოდა „თამაშის ახალი წესები“. „რუსთავი-2-თან“ ჯიბლაძე აცხადებდა, რომ კალაძის მოსვლის შემდეგ მას მოსთხოვეს, საკუთრება დაეზღვია კომპანია „უნისონში“ რადგან მისი თქმით, ამ კომპანიაში კახა კალაძის ინტერესები იკვეთებოდა.
3 ოქტომბერს სამშენებლო კომპანია „სვეტის“ ხელმძღვანელი პირები დააკავეს საქართველოს სისხლის სამართლის კოდექსის 180-ე მუხლის მე-3 ნაწილით გათვალისწინებული დანაშაულის (თაღლითობა, სამსახურებრივი მდგომარეობის გამოყენებით დიდი ოდენობით მართლსაწინააღმდეგო მისაკუთრების მიზნით სხვისი ნივთის დაუფლება მოტყუებით) ჩადენის ბრალდებით.
