დეკრიმინალიზაცია - ეს არის ის, რაც ჩვენ აუცილებლად უნდა გავაკეთოთ, - ამის შესახებ გაერთიანებული ოპოზიციის პრეზიდენტობის კანდიდატმა გრიგოლ ვაშაძემ გადაცემა „არჩევანში" განაცხადა.
მისი თქმით, ადამიანის ნარკოტიკული თრობა და სისხლის სამართლის კოდექსი ერთმანეთისგან ერთხელ და სამუდამოდ უნდა გაიმიჯნოს.
პრეზიდენტობის კანდიდატმა ასევე ისაუბრა შეწყალების საკითხზეც:
„უამრავი ადამიანი, ნიჭიერი ახალგაზრდები, ხშირად შემოქმედები, რომლებიც ციხეებში იმყოფებიან შენახვა, შეძენა, მოხმარებაზე, უნდა იქნენ შეწყალებულები. ეს უპირობოდ", - აღნიშნა ვაშაძემ.
მისი თქმით, საქართველო, უნდა გაიზიაროს ევროკავშირის ქვეყნების გამოცდილება ნარკოპოლიტიკაში.
„მინდა ვთქვა, რომ არაფერი არ გვიშლის ჩვენ ხელს, რომ წავიდეთ ცივილიზებული, ევროკავშირის რომელიმე ქვეყნის ნარკოპოლიტიკის გზით, რომელთაც უკვე მრავალი წლის გამოცდილება აქვთ. ყველაზე უფრო [მეტად] მე მომწონს პორტუგალიური კანონმდებლობა, მაგრამ ეს საკამათო თემაა", - განაცხადა ვაშაძემ.
მან ასევე დასძინა, რომ არასდროს დაუშვებენ მარიხუანის პლანტაციებს საქართველოში, „არ დაუშვებენ, რომ მთავრობა გადაიქცეს ნარკორეალიზატორად".
